Shtrenjtohet nafta/ Kur do kthehet Bordi i Transparencës? Ibrahimaj për Report Tv: Po monitorojmë, në 2022 u aktivizua kur shkoi mbi 220 lekë! I përgjigjet Braçes: S'ka kartel që cakton çmimet

Ministrja e Ekonomisë dhe Inovacionit, Delina Ibrahimaj, është shprehur se Qeveria po monitoron ndryshimet në çmimet e ushqimeve dhe të energjisë elektrike, pas nisjes së luftës në Iran.

Në emisionin ‘Repolitix’ me gazetarin Denis Minga në Report TV, Ibrahimaj tha se deri në këto momente nuk ka ndryshime drastike të çmimeve të ushqimeve apo të energjisë elektrike.

Ajo tha gjithashtu se Qeveria po vëzhgon me vëmendje situatën dhe në rast të ndryshimeve të ndjeshme të çmimeve janë të gjitha alternativat mbi tavolinë, edhe ndërhyrja në treg.

“Aktualisht nuk ka asgjë të jashtëzakonshme te çmimet e ushqimeve. Ne po monitorojmë situatën për çdo lëvizje. “Në rastet e çmimeve të ushqimeve është më e vështirë që Qeveria të përcaktojë një çmim fiks, sepse ka variacione të ndryshme. Në këtë moment që flasim nuk ka pasur një ndryshim thelbësor as në çmimin e energjisë elektrike.

Të gjitha çmimet, edhe çmimi i rritur i karburanteve ka reflektuar çmimin e rritur të bursave. Nuk mund të shprehem në këtë moment për çfarë ne i kemi në tryezë të gjitha alternativat dhe i monitorojmë me kujdes në bazë ditore. Jemi në komunikim ditor që të vlerësojmë gjithë komponentët. Do bëjmë ndërhyrje që do të shkojnë në më të mirën e zhvillimit ekonomik”, tha Ibrahimaj.

Ndërsa lidhur me informalitetin në vend, Ibrahimaj pranoi se nuk është zhdukur, por shtoi se është reduktuar ndjeshëm, sidomos te ‘puna në te zezë’ që sipas ministres është minimizuar.

“Informaliteti ndër vite është reduktuar. A është zhdukur? Jo nuk është zhdukur. Por mund ta them me plotë gojë se ka disa forma të informalitetit. Informaliteti në punë, pra puna e zezë është minimizuar. Ka shumë pak raste që punojnë të pasiguruar. Ne mund të kemi informalitet në paga. Ne jemi në monitorim të vazhdueshëm”, shtoi më tej Ibrahimaj.

Ministrja e Ekonomisë dhe Inovacionit, Delina Ibrahimaj, është shprehur se qeveria po harton një plan për ngritjen e një kompanie shtetërore të tregtimit të karburanteve.

Komentet Ibrahimaj i bëri në emisionin ‘Repolitix’ me gazetarin Denis Minga në Report TV, ku tha se një kompani shtetërore e naftës do të bënte të mundur sigurimin e më shumë rezervave në raste krize dhe mos-abuzimin me çmimin e tregtimit të karburantit.

Ajo tha gjithashtu se Qeveria ka një plan për miratimin e një ligji që do të mundësojë krijimin e një rezerve shtetërore të karburanteve, që do të shërbejë në raste krizash.

“Ne jemi akoma duke hartuar planin për ngritjen e një kompanie të tillë dhe do të dalë me një prezantim të asaj që kjo kompani do të bëjë. Është në planin tonë që përmes këtij instrumenti të bëjmë të mundur edhe një garanci më shumë të transparencës dhe eficencës në treg. Ne edhe në kuadër të procesit të integrimit, do të kemi në plan që të miratojmë një ligj që definon rezervën shtetërore, që do të jetë në pronësi të shtetit për përballimin e krizave. Po studiojmë kush janë modelet më të mira dhe do prezantohen brenda vitit”, tha mes të tjerash Ibrahimaj.

Ministrja e Ekonomisë dhe Inovacionit, Delina Ibrahimaj, është shprehur se qeveria po monitoron rritjen e çmimit të naftës në Shqipëri, pas nisjes së luftës në Iran.

Në një intervistë për emisionin ‘Repolitix’ me gazetarin Denis Minga, Ibrahimaj tha se gjatë vitit 2022, kur nisi lufta në Ukrainë, Bordi i Transparencës u aktivizua kur çmimi shkoi në 220 lekë për litër.

Ndërsa për situatën aktuale, duke lënë të kuptohej se Bordi do të ngrihej kur çmimi i naftës të shkonte pak a shumë në të njëjtin nivel, ministrja Ibrahimaj tha se do të shihet me vëmendje shpejtësia e rritjes së çmimit dhe situata gjeopolitike, para se të merret një vendim.

“Në kohën e krizës së Ukrainës ne i bëmë ndryshimet dhe u futëm në regjim kur çmimi kishte vajtur në 220 lekë. Unë s’po them që Bordi do aktivizohet kur çmimi të shkojë 220 lekë. Në varësi edhe të situatës gjeopolitike, do të shikojmë kur do të ndërhyjmë. Tani po bëjmë një monitorim ditor. Po shohim çmimet e bursës dhe tabelave.

Në momentin që shpejtësia rritet dhe sinjalet nga politika ndërkombëtare janë për një vijim të kësaj shpejtësisë së rritjes, ne do të marrim masat për të hyrë në këtë regjim. Në këtë regjim Bordi i Transparencës përcakton çmimin, ka marzhe të përcaktuara maksimale që mund t’i shtohen kostos. Ne për hir të së vërtetës marzhet i kemi vënë minimaliste. Nëse çmimet që Bordi do të vendosë, ka një penalitet dhe nëse ripërsëritet, shkohet deri në pezullim të licencës. Shqetësimi fillestar që ne kishim ishte verifikimi i rezervave. Sepse në një periudhë krize ti duhet të garantosh që ke produkt”, tha mes të tjerash Ibrahimaj.

Lidhur me rezervat e naftës që kompanitë kanë aktualisht, Ibrahimaj tha se ligji parashikon që ato të mbajnë rezerva për 1 muaj. Sipas Ibrahimajt, mbyllja e Ngushticës së Hormuzit nuk përbën rrezik për furnizimin me naftë në Shqipëri.

“Në një takim që kishim me përfaqësues të kompanive dhe shoqatën e hidrokarbureve na u garantua rezervat janë. Parashikimi është që kompanitë kanë detyrim që të mbajnë një rezervë një mujore. Dhe kanalet e tyre të furizimit i kanë garantuar se nuk do të ketë një mungesë të karburantit në treg, por vazhdimësi të furnizimit. S’ka një frikë për ndërprerje të furnizimit. Kompanitë kanë kontrata afatgjata me furnitorin, që u garantojnë furnizimin”, tha Ibrahimaj.