Rudina Hajdari: Hetimi në kufijtë e afatit kohor, dosjet '339' dhe '184' mund të mbyllen!

Kryetarja e grupit parlamentar demokrat Rudina Hajdari tha se dosja "339" dhe "184", për dyshime për shit-blerje të votave në Bashkinë e Dibrës kur u bënë zgjedhjet e pjesshme në 2016-ën dhe për zgjedhjet parlamentare 2017 me përfshirje të kryebashkiakut Vangjush Dako, mund të mbyllet. Ajo sqaroi se hetimet mund të kenë fatin e dosjeve të tjera të nxehta siç ajo i quajti, në të cilat kanë qenë të përfshirë politikanë të lidhur me krimin. Gjatë fjalës në Kuvend ajo tha se dosja mund të mbyllet pa  përfunduar plotësisht hetimi, i cili është në kufijtë e afatit kohor.

"Kryeministri tha sot që është i mbrojtur nga ndërkombëtarët dhe se opozita jashtë parlamentit nuk është e mbrojtur. Nuk është e vërtetë. Kryeministri po e humb mbështetjen se ai po e përdor këtë parlament për t'i hedhur benzinë zjarrit, për t'i bërë shantazh institucioneve të tjera, për arrogancën që e ka si në Shqipëri si jashtë saj. Ai sot mori përgjigjen nga Këshilli i Bashkimit Evropian për mos hapjen e negociatave. Përballë realitetit që ndodhemi sot, përballë fakteve që kanë dalë nga përgjimet nga një gazetë e mirënjohur gjermane, tregon një të vërtetë të hidhur. Vërtetë disa përgjime duhen parë më vëmendje, dhe i takon prokurorisë të hetojë. Por duke parë se organi i prokurorisë ndodhet në kolaps total, duke marrë parasysh vettingun dhe shkarkimin e më shumë se 50 % të prokurorëve, dosja 339 dhe 184 mund të mos gjejë përgjigje. Këto dosje mund të përfundojnë pa mbaruar hetimi plotësisht duke qenë në kufi të afatit kohor. Mund të mbyllet edhe kjo dosje e nxehtë, sepse në to ka shtetarë të lartë që kanë qenë pjesë e lidhjeve të politikës me krimin. Nëse nuk arrijmë këtë radhë të çojmë për hetim personat e përgjuar që kanë indicie, do të dështojmë për t'i dhënë shqiptarëve ndëshkimin e politikanëve që kanë qenë mbi ligjin", tha Hajdari.

Lajmi kryesor:

Rama: Në Shkodër mbase plan për një tjetër 2 prill! Hajdari: Pse këmbëngulni me 30 qershorin? S'duam viktima /VIDEO

G.M./Shqiptarja.com

TAG:
• edi rama
• voltana ademi
• Rudina Hajdari
• Pergjimet e Bild per Dibren
• seanca e kuvendit 20 qershor
• zhdekretimi i 30 qershorit
• Sulmohen KZAZ-të