Rumania, me 45 vdekje dhe mbi 1500 raste të reja, i trembet valës së dytë

Rumania po përjeton oshilacione përsa i përket rasteve të reja me Covid, gjë e cila ka frikësuar shumë nga ata të cilët mendojnë se ky është vetëm fillimi i një vale të re Covid

Të premten vendi regjistroi 2,343 raste të reja dhe 53 vdekje. Ky ishte rekordi i ri ditor dhe dita e tretë me radhë që vendi regjistroi më shumë se 2,000 raste të reja.

Kryeqyteti, Bukureshti, regjistroi rritjen më të lartë, me 517 raste të reja.

Për fat të mirë, të dielën, shifrat ishin në rënie të ndjeshme - 1,591 pozitivë dhe 45 viktima. Sidoqoftë, nuk është e mjaftueshme për të thirrur optimizmin pasi nuk dihet se çfarë do të ndodhë në ditët dhe javët e ardhshme.

Rekordi i së premtes së kaluar u arrit dy javë pasi ​​në Rumani u rihapën shkollat.

Ministri i Shëndetësisë Nelu Tataru të enjten tha se gjatë javës së kaluar ishin testuar pozitiv më shumë se 770 fëmijë, shumica prej tyre adoleshentë.

Shtretërit në njësitë e kujdesit intensiv në Rumani aktualisht janë me 55% të zënë dhe Dr. Rafila, menaxheri rumun i OBSH-së, thotë se qeveria duhet të konsiderojë "burime shtesë në lidhje me shtretërit në spitale”.

Midis qytetarëve, ekziston shqetësimi se rritja e numrit të rasteve mund të çojë në rivendosjen e kufizimeve, të hequra muajt e fundit.

Kryeministri Ludovic Orban tha se restorantet mund të mbyllen përsëri në lokalitete me më shumë se 1.5 raste të infeksioneve të reja për 1,000 banorë.

Në total, Rumania ka pasur 137,491 raste të koronavirusit deri më tani, me një numër prej 5,048 vdekjesh.

/Shqiptarja.com

TAG:
• Rumani
• OBSH
• Ballkan
• pandemi
• covid