‘Sa të mbaroj gjyqi do t’ju gjej dhe do t’ju vras’/ Biznesmeni shqiptar në Greqi tenton të djegë ish-gruan me benzinë dhe i vuri thikën në fyt vjehrrit, dënohet me 7 vite burg

GREQI- Një biznesmen shqiptar në fushën e ndërtimit është dënuar dje në shtetin grek me 7.5 vite burg pasi ka dhunuar ish-bashkëshorten e tij dhe ka kërcënuar me vdekje ish-vjehrrin duke i vendosur atij thikën në fyt. 46-vjeçari shqiptar me banim në Volos i cili kishte marrë më herët një dënim prej 40 muajsh, është i njëjti person i cili në një tjetër episod të mëparshëm mori benzinë dhe tentoi të digjte ish-bashkëshorten dhe babanë e saj.

Në “emër të dashurisë” për fëmijën e tij të mitur, ai tërhoqi zvarrë dhe dhunoi si ish-bashkëshorten dhe ish-vjehrrin, duke pretenduar më pas që gjithçka e kishte bërë pasi vuan nga problem të shëndeti mendor dhe se është përdorues droge, duke krijuar një alibi për veprimet e tij.

Mediet greke raportojnë se dy çështjet e tij u shqyrtuan dje ndërsa ai u vendos në paraburgim. Mirëpo mbrëmë në orën e vonë, ai ka telefonuar nga burgu në shtëpinë e ish-vjehrrit të tij dhe i ka thënë, “Sapo çështja në gjykatë të mbarojë, në 5 minuta do vij t’ju gjej kudo që të jeni dhe do t’ju vras”. Shqiptari 46-vjeçar, identiteti i të cilit nuk bëhet me dije nga mediat greke, kishte marrë paraprakisht një dënim prej 40 muajsh heqje lirie për dy incidente. Ai ishte ngjitur mbi kangjellat e shtëpisë së prindërve të ish-bashkëshortes, aty ku jetonte edhe ajo dhe fëmija i mitur dhe nisi të bërtasë duke i kërcënuar se do t’i djegë të gjallë.

Fatmirësisht ish-gruaja dhe fëmija nuk ishin në banesë, duke shmangur kështu një tragjedi të mundshme. Ai goditi me gurë ish-vjehrrin e tij dhe e kërcënoi me vdekje duke i vendosur thikën në fyt, ndërkohë që e godiste në fytyrë. Në makinën e tij u gjet një shishe plastike e mbushur me benzinë. Mediat greke raportojnë se ai gjithashtu ka kërcënuar edhe vetë prokurorin që është marrë me çështjen e tij.

B.K./Shqiptarja.com

TAG:
• greqi
• dhune ne familje