Tirane- Sali Berisha paralajmëron humbjen e zgjedhjeve parlamentare që pritet të mbahen vitin e ardhshëm. Përmes një postimi në facebook Kryetari i Partisë Demokratike, parapërgatit skenarin e justifikimit të humbjes së zgjedhjeve, i njëjti skenar i përsëritur dhe në zgjedhjet e kaluara.

Edhe këtë herë ai planifikon të bëjë përgjegjës për humbjen kreun e qeverisë Edi Rama,dhe bashkëpunëtorët e tij. Akuzon kreun e SPAK, Altin Dumani dhe prokurorin Arben Kraja - që po i kopsit dosjen e aferës së privatizimit të kompleksit Partizani, për të cilin po hetohet nën masën e sigurisë ‘arrest shtëpie’ për akuzën e Korrupsionit – se do të jenë mburojë e qeverisë Rama në këtë plan.

"Edi Rama, Ulsi Manja, Belinda Balluku, Damian Gjiknuri, Vangjush Dako, Pjerin Ndreu dhe dhjetëra kriminelë të tjerë elektoralë bëjnë plane për të vjedhur zgjedhjet e ardhshme nën mburojën e kriminelëve elektoralë, Altin Dumani dhe Arben Kraja’, deklaroi kryetari i PD-së, Sali Berisha gjatë fjalimit të mbajtur në tubimin qytetar.

Ndërkaq shumica e sondazheve si dhe analistë të pavarur parashikojnë një humbje në zgjedhjet e ardhshme të opozitës së drejtuar ende nga Sali Berisha.

Berisha, i cili ndodhet në arrest shtëpie që prej 30 dhjetorit 2023 pasi po hetohet për korrupsion, dy ditë më parë mori lajmin se do vijojë të jetë 'non grata', i padëshiruar' në Britaninë e Madhe. 

Komisioni Special i Apelimit të Emigracionit (SIAC) e quajti të pabazë kërkesën e e Berishës për aplikimin e formulës të imunitetit si ish-kreu i një shteti. Masa ‘non grata’ ishte apeluar nga Berisha në mars të këtij viti me argumentin se është i pabazuar në prova. Më herët, Shtetet e Bashkuara që e shpallën të parat non grata, deklaruan se nuk do të ndryshojnë qëndrim ndaj atyre që fusin në listë të zezë.