Shullazi në '41-BIS', sekuestrohet Hotel Vollga në Durrës (VIDEO)

Hotel Vollga është sekuestruar ditën e sotme në qytetin e Durrësit nga Agjencia e Administrimit të Pasurive të Sekuestruara dhe Konfiskuara. Hotelit të njohur në Durrës të kthyer në 'mollë sherri' për shkak të pasurisë i është vënë shiriti ditën e sotme nga policia, por akoma nuk ka informacion nga autoritetet në lidhje me sekuestrimin e godinës.

Historia e Hotel Vollgës është një ndër më të komplikuarat në vendin tonë, me pronarë të ndryshëm. Sipas gazetarit të Report Tv Artur Korriku, policia e Durrësit me një urdhër nga Tirana ka rrethuar me shirit vendin dhe kjo është e reja në këtë vend pasi dihet se ka qenë i bllokuar dhe nuk ushtronte funksionin për shkak të konfliktit të pronarëve. Një ndërtesë simbol për qytetin bregdetar, tashmë është kthyer në një gërmadhë dhe vendstrehim për të pastrehët dhe përdoruesit e drogës.

Emiljano Shullazi ka një pjesë të sipërfaqes së Hotel Vollga në Durrës, të cilën thotë se e ka marrë me dhurim dhe rezulton e regjistruar në hipotekën e Durrësit në emrin e tij, ndërsa prej ditësh është izoluar në regjimin special '41-BIS'. Ndërsa më 3 shtator, gjykata dhe prokuroria e Tiranës pushuan hetimin për Emiliano Shullazin dhe Ylvi Beqajn të akuzuar për pastrim parash për kalimin e pronësisë të Hotel Vollgës.

LEXO EDHE:
Shijak/ Kërcënuan me thikë dy persona dhe u morën celularët, një në pranga, tjetri në kërkim (EMRAT)

Historiku i Hotel Vollgës

Historia e pronësisë së Hotel Vollgës dyshohet se është e ndërtuar mbi falsifikimin e dokumenteve. Prokuroria e Durrësit ka dyshime të forta se prokura që është përdorur në shitjen e kësaj prone në vitin 1994, të jetë e falsifikuar. Në dosjen hetimore shkruhet se në 24 Mars 1994, kjo pronë i kalon në pronësi trashëgimtare, Alije Fortuzi. Po në 4 Dhjetor të këtij viti, përmes një prokurore të posaçme, shtetasi Ali Sula, në emër të Alije Fortuzit, ia shet atë shtetasit arab, Muhamed Abdulla Baëzeer, por më pas ka nisur një proces gjyqësor mes Alije Fortuzit dhe shtetasit arab.

Pas 9 viteve,në 2003-in trashëgimtarja Fortuzi arrin ta regjistrojë pronën në emër të vet. Po këtë vit ish-hoteli i kalon Zanmir Hasës, përmes një prokure të lëshuar në Selanik dhe e firmosur nga Alije Fortuzi. Por edhe për këtë prokurë hetuesit kanë dyshime se është e falsifikuar. Në bazë të regjistrit të gjendjes civile Zanmir Hasa ka jetuar në Selanik aty ku ka lindur edhe vajzën e tij. Por nuk bëhet me dije se si është njohur Zanmir Hasa me Alije Foruzin dhe më pas marrja e kësaj prokurore.

Shtetasi arab Baëzeer hap një proces tjetër gjyqësor dhe në korrik të 2014-ës Gjykata e Lartë vendos pezullimin e regjistrimit të kësaj prone në emër të tij. Po gjatë 2014-ës Gjykata e Durrësit me një vendim të dyshimtë, sipas Prokurorisë, anashkalon Gjykatën e Lartë dhe prona regjistrohet në emër të arabit. Pas këtij momenti Bawazeer shet 2/3 e pronës tek shtetasit Fejzi dhe Marjeta Kodra për shumën e 671 mijë eurove, ndërsa një pjesë të hotelit shtetasi arab ia dhuron për mirënjohje Emiljano Shullazit.

Prokuroria ka dyshime se Fejzi dhe Marjeta Kodra nuk kanë mundësi financiare të paguajnë një shumë të tillë dhe ka dyshime se kanë pastruar paratë. Por Fejzi Kodra thoshte se paratë i ka marrë nga nje miku i tij. Veprimet e shitjes dhe dhurimit, sipas prokurorisë, janë kryer nga shtetasi Ylvi Beqja, përfaqësues i kompanisë “Saudi Bradhers” të arabit Baëazeer. Dhurimi i është bërë Shullazit nën kërcënim sipas organit hetimor. Sipas prokurorisë, në dosjen hetimore dyshohet se është kryer një vepër penale tjetër në hipotekën e Durrësit dhe Tiranës, siç është ajo e zhdukjes së origjinës së kësaj prone dhe regjistrimin e saj në emër të Emiljano Shullazit.

TAG:
• 41 bis
• Emiljano Shullazit
• hotel vollga
• sekuestrim
• Durres

Sondazhi i ditës:

Si ka qene per ju viti 2024?

• I mire

  43.7%

• I keq

  22.7%

• As i mire as i keq

  33.6%

Vota total: 1610

Votat totale janë unike

• Sondazhi i ditës:

  Si ka qene per ju viti 2024?

  I mire I keq As i mire as i keq