Pushimet e gjata të dimrit nuk e kishin zbehur mërinë e socialistëve, të cilët lanë në fuqi përjashtimin 30 ditë pune për 6 deputetë të opozitës, të ndëshkuar për kaosin në seancën e fundit të vitit të shkuar duke i lënë jashtë Kuvendit deri ditët e para të marsit.

Në Byronë e Kuvendit, hallkën e fundit ku ankimohen masat ndëshkuese për deputetët problematikë, pati jo pak debate mes socialistëve dhe deputetëve opozitarë që e konsideruan të padrejtë ndëshkimin e tyre.

Ata akuzuan se përjashtimi erdhi për shkak të revoltës kundër Belinda Ballukut, e cila thonë ata po përdor parlamentin si mburojë politike.

“Pse jemi përjashtuar me 30 dite, sepse protestuam se Belinda Balluku u mor e pandehur nga SPAK dhe, në vend që të mbante përgjegjësi politike, ju e morët në mbrojtje. Në çdo vend demokratik, një zyrtar i akuzuar nga drejtësia jep dorëheqjen”, tha Hoti.

Replikat i vijuan në distancë edhe në rrjetet sociale duke ironizuar njëri tjetrin:

Në fund të mbledhjes së Byrosë së Kuvendit, demokratët paralajmëruan se do t’i drejtohen Gjykatës Administrative, e cila më herët ka rrëzuar përjashtimet e Kuvendit për deputetët e opozitës.

Për shkak të kaosit në seancën e 23 dhjetor të vitit të kaluar, PS kishte kërkuar ndëshkimin e 29 deputetëve të opozitës, mes të cilëve edhe të kryetarit të grupit Gazment Bardhit, por më të shumtët u amnistuan nga Komisioni i Etikës duke përjashtuar vetëm Belind Këllicin, Fidel Krekën, Albana Vokshi, Klevis Balliun, Flamur Nokën dhe Elda Hotin.

Rendit zhvillimet sipas orarit:
Ora 10:40
“Jeni me logjikën e kartonave”- Debate të forta në mbledhjen e Byrosë së Kuvendit, zbardhen pretendimet e deputetëve të përjashtuar të PD-së

Pavarësisht kërkesës së opozitës drejtuar Niko Peleshit, ka nisur me dyer të mbyllura për mediat mbledhja e Byrosë së Kuvendit, për të shqyrtuar ankimimin e PD-së për përjashtimin e 6 deputetëve demokratë nga seancat plenare për 30 ditë. Kjo pasi PS rrëzoi kërkesën e PD-së që mbledhja të zhvillohej e hapur për mediat.

Deputetët e përjashtuar të PD-së që janë prezentë në mbledhje, janë futur live përmes celularëve të tyre në rrjetet sociale, ku po pasqyrojnë një pjesë të asaj që po ndodh atje.

Mbledhja duket se është shoqëruar me debate të forta mes deputetëve të mazhorancës dhe opozitës, ku këta të fundit akuzojnë ligjvënësit e PS-së se kishin frikë nga prezenca e mediave dhe se po bunkerizojnë Kuvendin.

Po ashtu në qëndrimin e tyre, deputetët e PD-së janë shprehur se po bëjnë një betejë për një vend demokratik, për të mirën e qytetarëve shqiptarë. Ata pretenduan se po persekutoheshin nga mazhoranca, duke u përjashtuar nga punimet e Kuvendit.

Deputeti Agron Gjekmarkaj tha mes të tjerash se qeveria e Edi Ramës është e korruptuar dhe e lidhur me krimin e organizuar, teksa e krahasoi pushtetin e kryeministrit të ngjashëm me komunizmin.

“Ju jeni në logjikën e kartonave dhe jo në logjikën e së drejtës. Kryetari i Kuvendit ka preferuar të shmanget. Kjo është tregues dobësie. Deputetët e opozitës po bëjnë atë që ju nuk keni guxim ta bëni. Po bëjnë një betejë për një vend demokratik, që etërit e tyre e kanë marrë peng. Po bëjnë betejë për shtetin e së drejtës, të cilin ju e sulmoni dhe e keni marrë peng me korrupsion. Haxhi Lleshi ka qenë më tolerant me deputetët e tij në komunizëm sesa bijtë e Haxhi Lleshit sot përballë opozitës”, tha mes të tjerash Gjekmarkaj.

Kujtojmë se në 23 dhjetor të vitit të kaluar, Komisioni i Etikës, me kërkesë të PS-së, përjashtoi 6 deputetë të Partisë Demokratike me nga 30 ditë. Deputetët e përjashtuar për 30 ditë janë: 'Belind Këllici, Fidel Kreta, Albana Vokshi, Klevis Balliu, Flamur Noka dhe Elda Hoti.'

R.Xh/Shqiptarja.com