Rama: AirBnB-të fluks të ardhurash, nuk mund të mbeten të pataksuara! S’ka më derdhje të ujërave të zeza në det, do ngrihet task forcë

Qeveria ka hedhur për konsultim disa ndryshime në ligjin për turizmin, ndërsa edhe AirBnb Do duhet të pajisen me licencë. Kryeministri Edi Rama tha se kjo mbetet një sfidë, por ky biznes nuk mund të mbetet pa u taksuar ndërsa ka pasur fluks të ardhurash.

“Air BnB kemi qenë të vetëdijshëm s’ka shqetësim nëse paratë shkojnë direkt te familjet, por s’mund të jetë fluks të ardhurash që rriten dhe ndërkohe mbetet i pataksuar. Mbetet sfidë me vete se AirBnB, por ne kemi gjetur rrugët për të hapur një diskutim me ta edhe duke marrë parasysh shembullin e disa vende si Kroacia. Aty do jemi pak më të ngadaltë për faktin se kemi nevojë ti lëmë më shumë frymëmarrje familjeve që vënë shtëpinë një dispozicion për turizmin”, tha Rama.

Kryeministri Edi Rama thotë se këtë vit vendi ynë ka pasur nivelin më të lartë të sigurisë. Rama tha se barometri europian e nxori vendin e fundit në kontinentin europian për vjedhje. Për këtë Rama tregoi edhe një histori me miq gazetarë të cilit kishin pyetur se si ka mundësi që Shqipëria është renditur e fundit në kontinentin e Europës sa i takon vjedhjes. Kreu i qeverisë tha se gazetarët kishin pyetur se përse nuk ka vjedhje banesash dhe kishin marrë përgjigjen se “njerëzit s’kanë bukë për të ngrënë ca do vjedhin”.

Ndërkohë të njëjtit gazetarë kur kishin ikur në Angli dhe kishin pyetur përse ka kaq shumë vjedhje, sipas Ramës kishin marrë përgjigjen se “kanë ardhur shqiptarët këtu prandaj kemi dal në vend të parë për vjedhje shtëpish”

“Këtë vit kemi pasur nivelin më të lartë të sigurisë në 30 e kusur vitet e fundit. Minus 40% vrasje, krahasuar me vitin e kaluar që ishte viti më i mirë. Këtë vit Shqipëria i ka befasuar shumë njerëz, se jo ne, por barometri europian e nxori vendin e fundit në kontinentin europian për vjedhje, vendi i parë kampion Anglia. Disa miq që erdhën më bënë për të qeshur se e kishin parë këtë gjë dhe ishin habitur. Kishin pyetur këtu, se kush ka nge të shajë anglisht edhe në gusht këtu, e kishin pyetur si shpjegohet? Njerëzit s’kanë bukë për të ngrënë ca do vjedhin. Po të futesh në shtëpi s’ka bukë për të ngrënë. Kishin pyetur në Angli, se kanë ardhur shqiptarët këtu prandaj kemi dal në vend të parë për vjedhje shtëpish. Fakti është që jemi të fundit. Siguria nuk është çështje shifrash, por çështje ndjesie”, tha Rama.

Kryeministri Edi Rama thotë se edhe hotelet do të taksohen me çmim reference nga viti i ardhshëm. Në bilancin e sezonit turistik, Rama tha se dhomat e strukturave akomoduese kanë qenë plot, por në fakt biznesmenët nuk i kanë deklaruar. Rama tha se s’do të tolerohen as ata që nuk deklarojnë çmimet reale të dhomave.

“E kemi vënë me bindje TVSH 6% për hoteleri. Ju keni fituar shumë më tepër, ne s’kemi marrë atë që na takon si shtet në arkën e atë ardhurave që na duhet për këto gjërat e tjera. Me ca do ti bëjmë deri në fund gjithë infrastrukturat e nevojshme. Ne ca do rrisim fondin e trajnimeve profesionale, me të ardhura. Në Shqipëri këtë vit s’ka patur asnjë dhomë bosh, me miq që më kanë kërkuar dhomë kudo që të ishte. Si shpjegohet që te deklarimet keni qenë plot me dhoma bosh. Mirë një ëeekend keni sjell vjehrrin, një ëeekend krushqit, një tjetër shokët e fëmijërisë. Vitin e ardhshëm do keni një referencë dhe shteti do marrë atë që mendon se i takon, nën atë s’ka shans. Një referencë e thjeshtë e krijuar mbi bazën e tregut. E dimë shumë mirë se sa janë dhomat. Vitin e ardhshëm s’do pranojmë që keni pas dhoma bosh, një dhomë bosh për vjehrrin dhe vjehrrën do ua lëmë, por kur janë plot janë plot dhe e

Kryeministri Edi Rama është shprehur se puna për Korridorin Blu ka nisur në segmetin e Thumanë Kashar, ndërsa për segmentet e tjera marrëveshjet janë drejt përfundimit.

“Vijmë te aksesi në infrastrukturë. Edhe këtu është një arsye shumë e madhe për tu shqetësuar përballë sfidave që duhen fituar. Kemi të gjitha arsyet që mund ti fitojmë. E para aksesi në aeroport është zgjeruar dhe do të shumëfishohet me aeroporin e Vlorës.

Puna për korridorin blu ka nisur me segmetin e Thumanë Kasharit janë drejt përfundimit marrëveshjet edhe për segmente të tjera. Praktikisht vitin e ardhshëm do të jemi në kantier në kët ëkorridor. Nga Mali i Zi deri në Vlorë do kemi një korridor të standardeve Evropiane. Kroacia fillon investimin nga ana e vet, me shpresë që edhe mali i zi  të bëjë lidhjen, por do jetë një energji tjetër”, shtoi ai.

Kryeministri Edi Rama është treguar i prerë me bizneset në vijat bregdetare ku tha se sezonin e ardhshëm s’do tolerohet asnjë biznes që do derdhë ujërat e zeza në det apo në liqenin e Pogradecit. Rama tha se do ngrihet një task forcë për kontrollet.

Derdhje ujërash të zeza në det e në liqenin e Pogradecit. Kjo bëhet duke u thënë shumë qartë jo vetëm me fjalë por edhe me një akt të menjëhershëm ligjor por edhe me task forcë. Ata që kanë hotele restorante-kafene, që epoka e gropës mbaroi. Do investosh për derdhjen e ujërave të zeza. Është bërë edhe studimi sa kushton, është një kosto e përballueshme, s’po them që tu vëmë kufirin banorëve për banesat, shtëpitë që kanë gropat skeptike se do ishte  e padrejtë. Kostoja do ishte e papërballueshme, s’janë ata ndotësit më të mëdhenj. Ujërat e kristaltë të Maldiveve të Europës i ndotin ata që na ballë i vënë hotelit 5 yje dhe nga mbrapa i lëshojnë komunitetit mbetjet e yjeve. Nuk mund të vazhdojë”, tha Rama.  

Në një takim për bilancet e sezonit turistik veror 2023, ministrja e Turizmit dhe Mjedisit Mirela Kumbaro tha se 9-mujori shënoi 8,3 milionë, ose 1,9 milionë vizitorë të huaj më shumë se 9-mujori i vitit të kaluar.  Ndërkohë, vetëm muaji shtator u mbyll me 1,1 milionë vizitorë të huaj, rreth 30% më shumë se viti i kaluar.

“Në këtë vit, që meriton të quhet turistik, u krenuam, si me Tiranën që është kthyer në destinacion të mirëfilltë turistik si një  laborator arkitekturor modern por edhe plot energji rinore, sportive dhe kulturore, ashtu edhe agroturizmet nga Tropoja, apo Thethi deri ne Elbasan, Ersekë e Tepelenë, me lumin Vjosa në krye, pa përmendur këtu epitetet lavdëronjëse për bregdetin tonë nga mediat e huaja.

Thënë kjo, sfida dhe përgjegjësia bëhet edhe më e madhe, sepse pritshmëritë do të jenë shumë më të larta për vitin që vjen, prandaj, kjo do të jetë kryefjala: përgjegjësia për të mos zhgënjyer asnjë turist në 2024”, u shpreh ministrja Kumbaro.

“Muaji shtator u mbyll me 1,1 milionë vizitorë të huaj, rreth 30% më shumë se viti i kaluar, ndërsa 9-mujori shënoi 8,3 milionë, ose 1,9 milionë vizitorë të huaj më shumë se 9-mujori i vitit të kaluar.  Nuk i përmend për t’u krenuar por për t’u ndërgjegjësuar se kur vendi përshkohet, jetohet, eksperimentohet, udhëtohet, nga gati 5-fishi i popullsisë së qëndrueshme, përgatitja, mobilizimi dhe vëmendja, madje dhe alerti, janë dhe duhet të jenë shumë më lart”, theksoi Kumbaro.

Në analizën e sezonit turistik veror, ministrja Kumbaro foli për punën e bashkive dhe Agjencisë Kombëtare të Bregdetit për pastrimin e territorit, ku sipas saj lufta me mbetjet ende nuk është fituar dhe nga ana tjetër përmendi bashkëpunimin e suksesshëm me të gjithë aktorët që morën pjesë në mbarëvatjen e sezonit turistik veror si Policia Kufitare, Policia e Shtetit, Urgjenca Kombëtare, etj.

Ministrja Kumbaro përmendi si suksese të sezonit turistik veror 2023, Kalendarin e Unifikuar të Eventeve TEA, si dhe numrin e lartë të vizitorëve në Zonat e Mbrojtura.

“Këtë sezon i dhamë të gjithë vizitorëve një udhërrëfyese, një mikeshë në zbulimin e eventeve siç ishte TEA – Kalendari i Unifikuar i Eventeve Turistike, që në vetëm 2 muaj është shkarkuar më shumë se 23 mijë herë. Dhe s’mund të lë pa përmendur as vizitorët në Zonat e Mbrojtura, të cilat janë më shumë se asnjëherë tjetër, plot 3,2 milionë deri në muajin gusht, me qindra mijëra shqiptarë e të huaj që zgjodhën të futen në brendësi të territorit, në parqet natyrore e kombëtare, nga Alpet e Shqipërisë, e deri në Syrin e Kaltër.

Ministrja e Turizmit, Mirela Kumbaro njoftoi se po rishikohet ligji aktual për turizmin dhe projektligji është hedhur për konsultim publik. Ndërkohë, ministrja lajmëroi që po hartohet edhe strategjia e re të turizmit 2024-2030, që do jetë gati brenda këtij viti.

“Kemi tre kantiere të rëndësishme, rishikimi ligjit aktual. Ky projektligj është hedhur për konsultim publik, Duhet të nxisim mbështesim sektorin privat, por të garantojmë konkurrencë të ndershme. Do u jemi mirënjohës që ta jepni sugjerime të jeni pjesë e bashkëhartimit të draftit final. Kemi në përgatitje edhe strategjinë e re të turizmit 2024-2030, puna do kryhet brenda këtij viti dhe vitin tjetër do jemi në tryezat e konsultimi.

Instrumenti i ri i statistikave që do të ndërtojmë për truizmit, SAT. Për të kuptuar ku jemi, për të interpretuar të dhënat, për të ndihmuar formalizmin e mëtejshëm të tregut, do e kemi vitin e ardhshëm. Janarin 2024”, tha Kumbaro.