SHBA/ Joe Biden premton se do marrë masa për të frenuar përhapjen e variantit Omicron

Presidenti amerikan Joe Biden u zotua të hënën të marrë masa për të lehtësuar mungesën e testeve për COVID-19 ndërsa varianti Omicron përhapet në të gjithë shtetet e vendit këtë javë festash, duke kërcënuar të mbingarkojë spitalet dhe të prishë planet e udhëtimit.

Biden tha se hapat e administratës përfshijnë aktivizimin e një ligji për Prodhimin e Mbrojtjes për të rritur prodhimin e testeve që bëhen në shtëpi dhe për ta bërë më të lehtë përdorimin e faqes Google nga amerikanët për të gjetur një qendër testimi pranë tyre. Presidenti Biden e pranoi se përpjekjet kishin qenë të pamjaftueshme.

"Duke parë se sa e vështirë ishte për disa njerëz të bënin testin këtë fundjavë tregon se kemi më shumë punë për të bërë," tha Biden gjatë një takimi virtual mes ekipit të administratës për luftën ndaj COVID-19 dhe një grupi guvernatorësh të shteteve.

LEXO EDHE:
Biden fal dënimet me vdekje, konvertohet dënimi për 37 të burgosur

"Padyshim që janë të pamjaftueshme. Po ta kishim ditur, do të kishim vepruar më me shpejtësiu nëse do të kishim mundur."

Rritja e rasteve shkaktoi pengesa në udhëtimin me avion gjatë fundjavës së Krishtlindjeve pasi ekuipazhet e fluturimit u prekën nga virusi, duke shkaktuar mijëra anulime fluturimesh. Udhëtimet e kufizuara dhe testet e pamjaftueshme dëmtuan planet e tjera, ndërsa varianti më i transmetueshëm përhapej me shpejtësi.

Të hënën, linjat ajrore amerikane anuluan rreth 800 fluturime, dita e katërt radhazi me anulime që dëmtuan aksionet e kompanive ajrore.

Infeksionet me COVID-19 po rriten në mbarë vendin, me 205,509 infeksione të reja të raportuara mesatarisht çdo ditë, sipas agjencisë Reuters.

Të dielën, guvernatori i Luizianës, John Bel Edwards, tha se shtrimet në spital në shtetin e tij u dyfishuan brenda një jave dhe departamenti shëndetësor i shtetit bëri thirrje për kujdes përpara festës së Vitit të Ri.

Presidenti Biden të hënën paralajmëroi guvernatorët se rritja e rasteve ka të ngjarë të mbingarkojë disa spitale, veçanërisht në zonat ku një përqindje e lartë e njerëzve nuk janë të vaksinuar.

Ai më vonë u tha gazetarëve se do të ndiqte çfarëdo udhëzimi që japin ekspertët e tij mjekësorë përsa i takon reduktimit të mundshëmtë karantinës që aktualisht është 10 ditorë për amerikanët që rezultojnë pozitivë për COVID-19.

Presidenti nuk pranoi të thoshte nëse ai miraton vaksinimin e detyruar për udhëtimet ajrore të brendshme, një hap tjetër që zyrtarët e administratës e kanë diskutuar ditët e fundit.

Dr. Anthony Fauci, zyrtari më i lartë për sëmundjet infektive në SHBA, të hënën u kërkoi njerëzve të shmangin grupet e mëdha për Vitin e Ri për të reduktuar përhapjen e Omicronit.

Ndërsa zyrtarët kanë thënë se njerëzit mund të mblidhen me familjet nëse janë të vaksinuar, festimet më të mëdha janë më të rrezikshme.

Dr. Fauci tha se shpresonte se rastet në rritje do të binin në janar, por shtoi se shtimi i infeksioneve në përgjithësi mund të vazhdojë të mbingarkojë spitalet, veçanërisht në zonat me shumë të pavaksinuar.

"Ne duhet të vazhdojmë të jemi jashtëzakonisht të kujdesshëm," tha ai në televizionin MSNBC.

Javën e kaluar, Biden njoftoi për masa shtesë për të ndihmuar spitalet dhe shtuar testimet, por disa ekspertë të kujdesit shëndetësor thonë se përpjekja është e pamjaftueshme dhe vjen shumë vonë./VOA/

TAG:
• Joe Biden
• omicron