Shfuqizohet statusi i Cirkut,
artistët paralajmërojnë grevë

Vendimi i Këshillit te Ministrave i datës 7 Mars 2018 shfuqizon statusin e Cirkut Kombëtar duke e përjashtuar atë si institucion të pushtetit qendror dhe e kalon në pronësi të Bashkisë të Tiranës. Ka qenë pikërisht ky vendim që ka mbledhur Sindikatën e Pavarur të Artistëve të Shqipërisë, ku edhe pse kanë kërkuar sqarim nga ana e Ministrisë së Kulturës, nuk kanë marrë asnjë përgjigje. Përfaqësuesi i Sindikatës, Rudi Sata shprehet për Report Tv se ky vendim është në shkelje të ligjit.

“Nga cirk Kombëtar e quan Cirk të Tiranës, në një kohë kur cirku Kombëtar e ka marrë këtë status nga dispozita ligjore datë 18/11/2010 dhe është miratuar nga ¾ e Parlamentit. Dhe nuk ndodh kurrë që një akt nënligjor siç është VKM të prevalojë mbi dispozitat ligjore”, tha Sata.

Kryetari i Sindikatës të Artistëve të Cirkut, Julian Kazazi deklaron për Report Tv se nëse ministrja e Kulturës nuk i përgjigjet kërkesës së tyre për një takim zyrtar për zgjidhjen e këtij ngërçi, aktorët e cirkut do të gjejnë zgjidhjen në mënyra të tjera, të cilat do të jenë në përputhje me ligjin.

“Ne do të vazhdojmë që nga bojkotimi i aktivitetit tonë e deri në masa ekstreme si greva e urisë”, tha Kazazi.  Komuniteti artistik i Cirkut Kombëtar është i vendosur për të mbrojtur me çdo kusht statusin Kombëtar të këtij institucioni.

d.b/shqiptarja.com