Dëmet që shkaktuan shirat e mes janarit janë të pallogaritshme për dhjetë familje në lagjen "Sede" në zonën veriore të Përmetit.

Ata u shpërngulën nga autoritetet në konvikt apo tek të afërmit ndërkohë që pasuria e paluajtshme ka ngelur e shkretuar, dëmet në elektroshtëpiake apo mobileri kapin shifrën e dhjetëra miliona lekëve. Vetë banorët rrëfejnë atë që ndodhi atë ditë ku vërshimi i ujërave prej lartësive, ishte i paparë ndonjëherë.

“Ne jemi të parët që rrezikohemi nga përmbytja. Oshëtinte përroi aty. Kam edhe vjehrrën sëmurë, terreni është shumë i rrezikshëm. Ne kërkojmë nidhmë, asnjë ndihmë nuk kemi marrë”.

“Keq shumë është. Ka rrezik mund të shembet shtëpia, erdhi balta deri aty poshtë”.”, thanë disa prej banorëve

Ndonëse situata iku bashkë me motin e keq, pasojat që ajo la pas janë edhe më të rënda dhe të paparashikueshme. Ky masiv ndodhet në pjesën veriore të lagjes në fjalë dhe nga ajo çka shifet në pamje, është në kufijtë e të paparashikueshmes.

Spostimi i tmerrshëm i zonës dhe hendeku mes saj në disa metra, të jep përshtypjen e keqe dhe ndoshta prognozë të kobshme se çfarë mund të ndodhë në të ardhmen. Vetë banorët shprehin frikën për atë se çfarë mund të ndodhë në të ardhmen e afërt nëse autoritetet nuk ndërhyjnë urgjentisht.

“Ishte ora 9, na u duk si tërmet, i gjithë uji këtu poshtë. Na erdhi policia, na hoqi. Ka shkarë mbi 20 metra thellë.

“Ka rënë mali, ora 9 ishte. Erdhi policia, zjarrfikësit.", u shprehën disa banorë.

Autoritetet e Bashkisë në Përmet në mungesë të specialistëve gjeodezë, kanë kërkuar ndihmën nga Shërbimi Gjeologjik Shqiptar i cili është duke analizuar situatën në fjalë. Ndonëse konkluzionet ende nuk kanë mbërritur, nënkryetari i Bashkisë së Përmetit Flori Hasani shprehet se kjo gjendje kërkon ndërhyrje të menjëhershme.

“Si rezultat i reshjeve të ndodhura në datën 6 dhe 7 janar, në lagjen “Sede” është paraqitur një situatë ku ka pasur rrëshqitje të një masivi inertesh, ka sjellë një problematikë. Është kontaktuar Shërbimi Gjologjik Shqiptar për të bërë një vlerësim të saktë të situates. Bashkia është në pritje të këtij studimi për të vijuar më pas me zgjidhjen e problematikës. Ditën që ka ndodhur ngjarja, janë evakuar 4 familje, të cilat janë sistemuar që të gjitha. Pritet një vlerësim më i saktë nga Shërbimi Gjeologjik.", tha nënkryetari i Bashkisë së Përmetit, Flori Hasani.