TIRANË- Hipokrizi e ka quajtur ish- drejtori i Policisë, Arben Hajdarmataj, vettingun në Polici. I ftuar në hapësirën live të pasdites në ekranin e Report Tv, Hajdarmataj e ka konsideruar si të panevojshëm vettigun për uniformat blu.

Duke marrë shkas nga përjashtimi nga detyra të policit Arben Frashëri se nuk justifikonte një shtëpi 56 metra2, Hajdarmataj tha se askush në Shqipëri nuk mund të justifikojë me fatura ndërtesat e bëra para viteve 2000.

"Unë personalisht e kam kundërshtuar mënyrën e vettingut në Polici, sepse mënyra si erdhi Vettingu ishte për shkak të atributeve personale që mori Xhafaj në sistemin e Drejtësisë. Policia e Shtetit është i vetm institucion që ka një organ që e ndjek penalisht, SHÇKB-ja. Në momentin që ka një shkelje penale ndiqet nga SHÇBA, nëse prokuroria nuk e ka, apo administratat e tjera jo, policia e ka. Në këtë arsye nuk e shoh të nevojshme Vettingu në Polici.

Asnjë person në Shqipëri që ka ndërtuar një shtëpi para viteve 2000 nuk ka mundësi që të gjejë fatura. Kush është ai shqiptar, nuk i kanë as bizneset, jo polici që tull laç e ka bërë vetë, dhe ti i thua nuk e justifikon, imagjino çfarë hipokrizie ka Vettingu në Polici", tha Hajdarmataj.

Nisur nga eksperienca e tij, duke bërë analizë të dinamikës së ngjarjes në Malësinë e Madhe, për Hajdarmatajn, Klement Pepaj dhe Vilson Çutaj mund të kenë qenë pronarët e drogës. Megjithatë, kjo është një pistë, i mbetet grupit hetimor për të zbardhur të plotë ngjarjes.