Shkencëtarët në garë për të gjetur një 'vaksinë universale' efektive kundër të gjitha varianteve të COVID-19

Në një kohë kur shkalla e përhapjes së varianteve të reja të COVID-19 po rritet ndjeshëm, tanimë  qëllimi i të gjithë shkencëtarëve është arritja e një vaksinë universale efikase kundër të gjitha llojeve.

Rreth 20 ekipe në të gjithë botën janë në fazat e hershme të zhvillimit të vaksinave që ofrojnë mbrojtje më të gjerë kundër një sërë koronavirusësh. Para pandemisë, studiuesit përpiqeshin të gjenin një vaksinë universale kundër gripit dhe provat e tyre para-klinike ishin premtuese.

Tanimë synimi është për të trajtuar COVID-19 në të njëjtën mënyrë.  Dallimi me vaksinat është pjesa e virusit që ata synojnë të godasin, vaksinat aktuale kërkojnë të shkaktojnë një përgjigje të antitrupave duke  sulmuar proteinën spike, e cila është në sipërfaqen e virusit. Vaksina universale nën zhvillim në një kompani bioteknike në Francë, synon proteinën nukleokapsid - e cila është brenda virusit dhe më pak e prirur për mutacione.

 "Ne kemi në shënjestër të një pjese brenda virusit, e cila nuk është e arritshme për antitrupat, kështu që ne trajnojmë sistemin imunitar për të zhvilluar një lloj tjetër të përgjigjes: një imunitet qelizor", thotë Delphine Guyon-Gellin menaxherja e projektit 'vaksina universale' .

Kompania shpreson të fillojë provat klinike për vaksinat universale kundër COVID-19 në një vit. Tani për tani, provat janë mbi kafshët.

Ka shumë laboratorë të tjerë që janë në kërkim të vaksinës universale. Në Shtetet e Bashkuara, Belgjikë dhe Kanada, një total prej dhjetë laboratorësh dhe universitetesh kanë filluar kërkimet.

Por a mundet kjo vaksinë potenciale të parashikojë të gjitha evolucionet e ardhshme të virusit?

Pascal Brandys, CEO i Phylex Biosciences thotë se askush nuk mund të bëjë parashikime afatgjata. "Ekziston një mundësi e një forme krejt të re të virusit. Por në lidhje me llojin aktual, duke përfshirë mutacionet më të rëndësishme, unë mendoj se është e mundur të zhvillohet një vaksinë universale që mund të jetë efikase për të paktën disa vjet "

Kjo është gara tjetër që është nisur në të gjithë botën: gara për një vaksinë universale. Problemi është se ka ende paqartësi në lidhje me efikasitetin e tyre të mundshëm dhe do të duhet kohë për zhvillimin e tyre - një proces që mund të zgjasë me vite.

TAG:
• Koronavirus
• COVID-19
• Vaksina anti Covid