Tentativa për të vjedhur një shtëpi në Itali u kthye në tragjedi për një shqiptar 38-vjeçar me origjinë nga Bulqiza, i cili u qëllua për vdekje nga pronari i shtëpisë. 

Sipas mediave italiane, Arbër Xheleshi, për të cilin Report Tv mëson se e ka ndërruar emrin, shkoi të grabiste në një vilë në Santopadre në provincën e Frosinone, 4 ditë më parë. Babai i një vajze të vogël, shkoi i armatosur me një pistoletë lodër, ndërsa pronari i shtëpisë që e pikasi, pa e kuptuar qw arma ishte bosh, u kundërpërgjigj duke e qëlluar me një armë gjahu. 

Kanë qenë disa familjarë të të riut shqiptar, që jetojnë në provincën e Trentos, të cilët bënë identifikimin e trupit.

Sipas mediave italiane, shqiptari kishte shkuar të grabiste, i shoqëruar edhe nga disa persona të tjerë, të cilët mundën të arratiseshin pasi u përballën me pronarin e vilës, Sandro Fiorelli, shitës  në një kioskë, dhe djalin e tij. Arbër Xheleshi i është drejtuar me armë pronarit, i cili e qëlloi në shpatull me çifte. Hetimet mbi ngjarjen vijojnë, ndërsa pronari italian i shtëpisë po hetohet për vrasje në kushtet e vetëmbrojtjes.

38-vjeçari për autoritetet italiane është person me precedentë penalë, ndërsa mediat shkruajnë se asnjë anëtar i familjes së tij nuk ka marrë avokat.