Shkrija e Akademisë së Shkencave, PD: Vepër e Ramës, po u shërben qarqeve anti-shqiptare

Propozimi i ministres së Arsimit, Besa Shahini për të shkrirë Akademinë e Shkencave të rajonit në një të vetëm, është cilësuar si absurd nga përfaqësues të opozitëz. Ish- deputetja e PD, Albana Vokshi në një status të publikuar në rrjetet sociale, shkruan se ky propozim është bërë në mënyrë të fshehtë pa marrë mendimin e askujt. Për PD-në, kjo është një tjetër vepër që pas qëndron Edi Rama.

"Per t’ja arritur këtij qellimi, po perdor marionetën e tij në krye të Ministrisë së Arsimit dhe deputetë injorantë apo ilegjitimë. Në mënyrë të fshehtë, pa transparencë, pa marrë mendimin e askujt, në shkelje të procedurave dhe ligjeve, me draftin e propozuar të ligjit për Akademinë e Shkencave, po i paraprin idesë për shkrirjen e një ndër institucioneve më të rëndësishme për të vërtetën shkencore dhe interesave kombëtarë.

Pasi ka shkatërruar politikën, ekonominë, kulturën, arsimin, zgjedhjet, drejtësinë, pasi ka kapur të gjitha pushtetet, tani kërkon të shkatërrojë edhe akdeminë dhe shkencat shqiptare.Me një urrejtje patologjike ndaj popullit të tij, me kompleksin ndaj dijes dhe intelektualëve, të gjitha projektet e tij synojnë shkatërrimin e cdo gjëje që ruan dhe trashëgon identitetin shqiptar, sic është edhe rasti i Akademisë së Shkencave.

Me këtë veprim, Kryeministri në ikje po u kryen shërbimin e fundit qarqeve anti-shqiptare për të eleminuar Akademinë e Shkencave në Shqipëri, plani i nisur që para dy vitesh, kur kërcënoi me heqjen e fondeve dhe shkrirjen e Akademisë së Shkencave.

Të ngrihemi të gjithë në këmbë të ndalojmë planin ogurzi të Edi Ramës për zhdukjen e institucioneve pjesë e identitetit kombëtar shqiptar", shkruan Vokshi. 

B.K./G.M./Shqiptarja.com

TAG:
• Albana Vokshi
• akademia e shkencave
• Besa Shahini