Është dita e shtatë me sytë drejtuar nga qielli dhe tabelat elektronike që përditësojnë informacionin mbi nisjet dhe mbërritjet. Shtatë ditë me fluturime të anuluara, vonesa, devijime në aeroportet e gjysmës së Siçilisë dhe pritje që e kanë shndërruar aeroportin Fontanarossa në purgatorin veror të mijëra udhëtarëve. Etna vazhdon të shpërthejë dhe aeroporti i Catanias (ende i mbyllur sot të paktën deri në orën 18:00) vazhdon të paguajë çmimin e hirit vullkanik, duke funksionuar me ndërprerje. Fundi i problemeve nuk mund të parashikohet.

Sipas vlerësimeve të para, vetëm në Palermo, që nga rifillimi i aktivitetit të vullkanit janë devijuar 190 fluturime. Pasojat i kanë vuajtur rreth 30 mijë pasagjerë. Në rrjetet sociale, pushues të zemëruar postojnë foto të radhëve të pafundme pranë sporteleve të kompanive ajrore, duke treguar se janë detyruar të organizohen për të arritur në aeroportet e reja me një njoftim shumë të shkurtër. Palermo, Trapani dhe (deri mbrëmë) Comiso ishin “rrugët e shpëtimit”. Hiri, në fakt, detyroi të mbyllej edhe ky aeroport.

Por nga Catania, të arrish në Palermo dhe Trapani nuk është aspak e thjeshtë: autobusët janë plot, makinat me qira nuk gjenden, ka pak shërbime transporti dhe taksitë janë jashtëzakonisht të shtrenjta. Emergjenca nxjerr në pah një pikë të ndjeshme: sistemin aeroportual të ishullit. Nëse aeroporti kryesor (i pesti në vend) has vështirësi, pasojat janë katastrofike. Për ata që udhëtojnë, por jo vetëm.

Hotelet, agjencitë dhe operatorët turistikë kanë frikë nga anulimet, heqja dorë nga udhëtimet dhe një dëm i konsiderueshëm për imazhin. Fiavet Sicilia kërkon ngritjen e një tryeze të përhershme për emergjencat aeroportuale, ndërsa guvernatori Renato Schifani njofton alokimin e fondeve të reja. Vullkanin nuk mund ta kontrollosh, por lidhjet e transportit po, thonë këshilltarët bashkiakë të Mpa, FI dhe Lega, duke drejtuar gishtin nga Sac, kompania që menaxhon aeroportin. Ndërkohë, vetëm pak kilometra larg kaosit të Fontanarossa-s, rrjedhat e lavës që mbajnë avionët në tokë tërheqin drejt vullkanit qindra kureshtarë: për ta, është spektakli i verës.

Sipas Vaac (Volcanic Ash Advisory Center) të Tuluzës, reja e hirit ka arritur në një lartësi prej rreth 5,500 metrash dhe po lëviz drejt jugut dhe jugperëndimit. Në sasi të kufizuara, hiri është raportuar edhe në Maltë dhe Libi./Corriere