Shpifjet! Berisha, Basha e Paloka 
para gjykatës, 10 padi në 7 muaj

TIRANË - Gjuha e përdorur në seancat plenare dhe akuzat e pakontrolluara në foltoret e partive, janë përkthyer në padi të njëpasnjëshme për shpifje për tre aktorët kryesorë të Partisë Demokratike. Në vetëm 7 muaj, kryetari i PD-së Lulzim Basha, ish-kryeministri Sali Berisha dhe kryetari i grupit parlamentar të PD, Edi Paloka janë paditur në të paktën 10 raste për shpifje. Padinë e fundit për shpifje, ish-kryeministri Berisha i cili mban edhe rekord sa i takon padive të ngritura ndaj tij për këtë akuzë e mori dje nga dega e Lëvizjes Socialiste për Integrim dhe LRI e Shkodrës.

Duke i quajtur shpifje dhe dezinformim të opinionit publik foton e ish-kryeministrit Berisha lidhur me atë që ai e quan “tollonat për blerjen e votës” nga LSI, kjo forcë politike dhe lëvizja rinore e saj kanë përgatitur një padi civile për shpifje për të. Padia e ardhur nga Shkodra për Berishën, vinte vetëm pak ditë pas dy padive të tjera që kandidatja e mazhorancës Keti Bazhdari depozitoi në gjykatë për ish-kryeministrin. Bazhdari e paditi për shpifje Berishën, lidhur me akuzat që ky i fundit artikuloi të enjten e kaluar në seancë plenare sa i takon mënyrës së vënies së pasurisë nga kandidatja e mazhorancës.

Nëse do ta humbë këtë betejë gjyqësore, Berisha do të duhet të paguajë edhe 40 milionë lekë të vjetra në llogarinë e Bazhdarit. Sërish për gjuhën e përdorur në Kuvend, Berisha në shkurt të këtij viti nga drejtuesi i “Fiks Fare”, Filip Çakulli. Megjithatë nëse e humb këtë betejë Berisha do të paguajë vetëm 1 lekë, pasi kjo është shuma e kërkuar nga Çakulli. Për kreun e PD-së Basha, padinë për shpifje e inicioi deputeti i PS Arben Ndoka. Basha shpesh herë e lakoi emrin e tij si të lidhur me krimin. Ndërkohë që pak kohë më pas erdhi edhe një padi penale ndaj Bashës në pozitat e kryebashkiakut të Tiranës nga INUK, e cila e akuzoi atë për dhënie të lejeve të ndërtimit kundra parimeve ligjore. Basha duhet të jap përgjigjen si kreu i PD-së edhe për paditë e ngritura ndaj forcës së tij politike.

Kryeministri Rama ka ngritur një tjetër padi për shpifje, lidhur me akuzat e artikuluara nga selia e PD-së ndaj tij lidhur me fshehjen e akuzës së ardhur nga Belgjika për deputetin Mark Frroku. Padi ndaj selisë blu për të njëjtën akuzë është ngritur edhe nga tre kandidatët e mazhorancës për zgjedhjet vendore. Artur Bushi(Krujë), Safet Gjici(Kamëz) dhe Elvis Roshi(Kavajë), sipas një njoftimi të deputetit Taulant Balla kanë paditur PD për shpifje. Në listën e padive për shpifje bën pjesë edhe kryetari i grupit të PD-së Edi Paloka. I pari që e paditi Palokën për shpifje ishte kryeministri Rama në lidhje me çështjen “Shullazi”, çështje për të cilën ka paditur edhe sekretarin e PD-së Arben Ristani. Ndërkohë që një tjetër padi për shpifje ndaj Palokës erdhi pak ditë më parë edhe nga ministri i Brendshëm Sajmir Tahiri.


Shkrimi u publikua sot (14.05.2015) nw Shqiptarja.com versioni print
 
Redaksia online
(k.b/shqiptarja.com)