Shqipëria kalon me 39 njësi
zvogëlohet territori i Tiranës

TIRANE- Ndarja territoriale me 39 njësi vendore, dhe duke shtuar fraksione të  kalimit me 47 bashki mbetet varianti që do të kalojë për votim në parlament. Komisioni për Reformën Territoriale të Shqipërisë ka mbyllur votimin, duke kaluar në fazën e konsultimeve në terren. Me konsensus deputetët e mazhorancës kanë përjashtuar propozimet me 30 njësi zgjedhore 57 dhe me 63 njësi.

Gjithsesi projekti nuk do të cënojë sistemin elektoral apo dhe Kushtetutën. Ashtu si dhe u shpreh ministry i Shtetit për Çështjet Vendore, Bledi Çuçi, për të realizuar ndryshimin e funksionit të qarqeve do të duhen mbi 93 vota. Duke parë se për këtë duhet konsensusi i opozitës është kërkuar që kjo të kalojë në një diskutim të dytë. Ndaj dhe është propozuar vetëm kufizimi i numrit të qarqeve dhe jo të funksionit të këtyre njësive, edhe pse roli i qarqeve deri më tani rezulton i dështuar. Vetë reforma konsiderohet e plotë duke parë se roli i pushtetit vendor është rishikuar në mënyrë të plotë.

Përplasja me zgjedhjet
Ndarja e re territoriale nuk do të ketë ndikim në ndryshimin e ZAZ apo dhe të Kodit Zgjedhor. Megjithatë në një farë mënyrë dhe reforma e bashkive sjell dhe prekjen e sistemit elektoral. Por që për ministrin Çuçi dhe kjo kërkon një rishikim të Kodit Zgjedhor, e cila mbetet në një diskutim me përfaqësuersit e opozitës. Ndaj dhe konceptimi i ndarjes së re territoriale do të mbetet në kuadrin e menaxhimit të ekonomisë dhe të mirëmenaxhimit të fondeve. Përsa i përket largimit të shërbimeve që ofronin komunat, kryetari i Komisionit, Bashkim Fino u shpreh se ky koncept nuk do të preket. Pasi do të vijojnë shërbimet që i kishte në dorë komuna. Në variantin e ri do të jetë kreu i bashkisë që do të ketë të dërguarit e tij, apo të mandatuarit për të realizuar këto detyrime.

Zonat problematike
Dy zona janë parë me rezervë nga anëtarët e komisionit në propozimin e ardhur nga qeveria. Varianti që e ndan Shqipërinë në 39 zona zgjedhore, ka marrë mbështetjen e plotë nga anëtarët, por duke kërkuar rishikimin e Himarës si dhe të Tiranës. Ka qenë Blendi Klosi i cili shprehu rezervat mbi Tiranën si një superbashki. Ndaj duke parë se kufijtë e rinj propozojnë përfshirjen e rreth një të tretës së banorëve të Shqipërisë, është kërkuar një ngushtim i propozimit. Ndaj dhe mendimi i tij është përfshirë në draftin e miratuar prej komisionit. Ashtu si dhe kërkesa për shmangien e një teorie të bashkisë etnike.

Ftesa
Anëtarët e komisionit kanë bërë ftesë partive të opozitës të shprehin mendimin e tyre mbi hartën e re territoriale. Madje, Fino theksoi se përgjatë këtye ditëve ka pasur komunikim me të zgjedhurit vendor të PD, mbi formën e propozuar. Ftesë e cila pritet të mbetet sërish pa përgjigje deri në fundin e kësaj legjislature. Kohë kur opozita duket se do të shprehë dhe kundërshtimin e saj, jo vetëm për shkak të diskutimit të njëanshëm, por dhe prej parimit të vendosjes së të drejtës së vetos në seancë.

Redaksia Online
(d.a/shqiptarja.com)