POP 5

Lajmet më të lexuara të 5 minutave të fundit

Kosova & Rajoni

Shqiptarët e akuzuar për vrasjen e
të rinjve, dëmshpërblim nga Serbia

Gjashtë shqiptarët e akuzuar për vrasjen e 5 të rinjve serbë në Pejë më 1998 kërkojnë dëmshpërblim. Zv/kryeministri i parë i Serbisë, Aleksander Vuçiq ka pohuar se vrasjet ishin bërë nga makineria e Sllobodan Millosheviq-it.
BEOGRAD-“Serbia nuk do ta ketë lehtë me ne. Do të kërkoj dëmshpërblim moral dhe material për të gjitha torturat që më janë bërë”, ka thënë një prej ish të akuzuarve shqiptarë për vrasjen e gjashtë të rinjve serbë në qytetin e Pejës në vitin 1998, Agron Kollçaku.

E vërteta është se vrasjet e kryera në Pejë, më 14 Dhjetor të 1998 në lokalin “Panda” ishin bërë nga makineria e Sllobodan Millosheviq-it.

Këto të dhëna shokuese i ka bërë publike ditë më parë vetë zv/kryeministri i parë i Serbisë, Aleksander Vuçiq.

Për këtë ngjarje, policia serbe kishte akuzuar 5 të rinj shqiptarë, të cilët i kishte mbajtur në burg përgjatë një viti.
Tani, kur vetë shteti serb po nxjerr në dritë të vërtetën, dy prej 5 të akuzuarve shqiptarë të asaj kohe thonë se do të ndjekin çdo rrugë ligjore për të paditur shtetin serb.

Duke treguar për torturat çnjerëzore që kishin përjetuar gjatë qëndrimit në burgjet serbe, shqiptari i akuzuar i asaj kohe, Agron Kollçaku, është shprehur se çfarëdo dëmshpërblimi me para s’i bën të harrojë vuajtjet, por megjithatë ata do të vazhdojnë me procedurat.

“Më kanë rrahur me shkop bejsbolli. Më kanë rrahur deri sa më ka rënë të fikët. Më kanë hedhur ujë dhe përsëri ka vazhduar tortura”, ka rrëfyer ai.

Edhe Vllaznim Përgjegjaj ka theksuar se kjo çështje nuk do të mbyllet vetëm me një deklarim publik të shtetit serb. Rrjedha e ngjarjes për të ende është e kthjellët, ndërkohë që traumat ai i ka ende në trup dhe mendje.

“Ma kanë thyer këmbën, më kanë prerë hundën me thikë. Të burgosurve të tjerë iu prisnin veshët, gishtat dhe nuk di çka tjetër”, ka treguar i shokuar Përgjegjaj.

Dyshimi se të rinjtë serbë ishin vrarë nga vetë makineria e Serbisë kishin nisur që në emergjencën e spitalit. Disa nga punonjësit e asaj kohe tregojnë për presionin që kishin pasur që trupave të mos u afrohej asnjë nga personeli shqiptar.
“Bëmë transportimin e parë me dy trupa, pastaj me tre. Kur i çuam në spital nuk afrohej njeri tek ata”, tregon Hydavehbi Kastrati, shofer i autoambulancës që kishe bartur viktimat në Prishtinë.

Pas vrasjes së 6 të rinjve serbë dhe plagosjes së disa të tjerëve në lokalin “Panda” në Pejë, makineria serbe kishte aktivizuar orën policore në atë kohë.

Pas kësaj ngjarjeje, shumë qytetarë ishin likuiduar në mënyrë të mistershme, përfshirë edhe rastin e vrasjes së doktorit Nuredin Çeku, më pas të doktorit Xhevdet Gashi dhe shumë civilëve shqiptarë, dosjet e të cilëve ende janë të mbyllura për familjarët dhe opinionin kosovar.

Redaksia online
(b.g/ shqiptarja.com)
 

/Shqiptarja.com
  • Sondazhi i ditës: 5 Shkurt, 10:32

    Informaliteti e nëndeklarimi pagave po dëmtojnë pensionet, sa po luftohen?

Lajme të tjera



×

Lajmi i fundit

Mero Baze: Gjunjëzimi i PD para 'Kandidatit për Kryeministër'

Mero Baze: Gjunjëzimi i PD para 'Kandidatit për Kryeministër'

5 Shkurt, 23:02 nga Mero Baze