TIRANË- Sporti shqiptar në zi! Sëmundja në mushkëri, i ka marrë jetën ikonës së sportit dhe peshëngritjes shqiptare, Ferit Berberi, 'Mjeshtër i Madh'. Lajmi u konfirmua nga miqtë e tij, teksa lartësojnë figurën e Berberit, si profesionist, por edhe si njëri.
Berberi është i vetmi shqiptar që ka ngritur në total 417 kilogramë në tre disiplina të ndryshme. Pasi mbaroi karrierën si profesionist Berberi iu dedikua botës së trajnerit ku gjithashtu stërviti emra tepër të njohur si Aleksandër Kondo, Agron Haxhihyseni, Xhemal Qarri, Ardian Kokonozi dhe të tjerë.
Një e veçantë është se Beberi ka stërvitur edhe presidentin aktual të Shqipërisë. Dalja e fundit në ekran e Berberit ishte në intervistën e dhënë për gazetarin e Report Tv, Ernest Koçi, në një speciale të përgatitur për jetën e tij.
Ferit Berberi në intervistën për Report Tv
Presidenti Ilir Meta ka reaguar përmes një statusi në rrjete sociale për ndarjen nga jeta të ikonës së sportit dhe peshëngritjes, Ferid Berberi. Meta shprehet se ai ishte një personalitet dhe një legjendë e jashtëzakonshme e kësaj disipline. Ndër të tjera Presidenti shkruan se Berberi e tërhoqi në magjinë e peshëngritjes, e edukoi me shumë pasion me vlerat më të mira sportive.
“Me shumë trishtim dhe dhembje mësova sot për ndarjen nga jeta të Profesorit tim të dashur, Ferid Berberi, një nga kampionët më jetëgjatë në historinë e sportit tonë për më shumë se katër dekada, ish-trajnerit të madh të peshëngritjes të Ekipit Kombëtar dhe Dinamos. Në rininë e tij ai jo vetëm shkëlqeu si kampion dhe rekordmen, por prodhoi edhe shumë kampionë e rekordmenë, ikona të peshëngritjes tonë, që shkëlqyen edhe në nivel europian e botëror si Aleksandër Kondo, Agron Haxhihyseni, Muharrem Berisha dhe Ardian Kokonozi.
Përjetë mirënjohës Profesor Feridit, i cili më tërhoqi edhe mua në magjinë e peshëngritjes, më edukoi me shumë pasion e dashuri me vlerat më të mira sportive dhe mbi të gjitha se nuk ka arritje dhe suksese pa një punë të jashtëzakonshme dhe të qëndrueshme. Ai futi metodat më bashkëkohore në programet e stërvitjeve dhe studionte vazhdimisht duke modernizuar sportin e peshëngritjes. Me profesionalizmin dhe përkushtimin prindëror për të përgatitur denjësisht kampionë dhe rekordmenë, ai do të mbetet i paharruar si shembull i çmuar dhe frymëzues i gjeneratave të tëra sportistësh në rrugën e suksesit dhe të fitoreve.
Ju shpreh ngushëllimet më të sinqerta familjes Berberi dhe komunitetit sportiv të peshëngritësve, që humbën sot një personalitet dhe një legjendë të jashtëzakonshme të kësaj disipline. Kujtimet me Profesor Feridin për një periudhë shumë të bukur të jetës sime, do t’i ruaj përherë të gjalla si atëherë. Lamtumirë Kampion! Të prehesh në paqen e merituar!”-shkruan Meta.
![](https://shqiptarja.com/template/img/antipiracynote.jpg)
![](https://www.shqiptarja.com/template/img/sh_logo1.png)