Sipërmarrja ndryshon qasje në huamarrje, BSH: Është rritur kredia në lekë për shkak të interesave të ulta

Bizneset kanë ulur kërkesën për kredi gjatë këtij viti, duke reflektuar një përmirësim të gjendjes së tyre të likuiditetit ku ndikim të fortë pozitiv ka pasur ecuria e turizmit.

Banka e Shqipërisë thotë se gjatë kësaj periudhe janë ulur interesat e kredive në lekë, çka ka bërë që sipërmarrja të drejtohet drejt huamarrjes në monedhën vendase, e cila është rritur me 16 miliardë lekë gjatë këtij nëntëmujori. 

“Një tendencë tjetër e vërejtur gjatë vitit 2023, ishte zhvendosja e portofolit të kredisë për biznese nga kredia në valutë – kryesisht euro – në kredi në lekë. Kjo zhvendosje është motivuar nga diferenca në rënie midis interesave në lekë dhe atyre në euro, por edhe nga mbiçmimi i kursit të këmbimit. Në fund të muajit shtator, kredia në valutë ishte 1.3% më pak se një vit më parë. Në fund të muajit shtator, kredia në lekë për biznese shënonte një zgjerim vjetor prej 7.6%, ndjeshëm më e lartë se rritja mesatare prej 1% e gjashtëmujorit të parë të vitit”, thuhet në raportin e Bankës së Shqipërisë. 

LEXO EDHE:
Dibër/ 35 vjeçari aplikon për kredi në emrin e dikujt tjetë përmes degës postare Peshkopi

Referuar raportit norma e interesit për kreditë në lekë në tremujorin e tretë të vitit ishte 6.4% nga 6.9% që ishte në gjysmën e parë të vitit. Interesat janë më të ulta për bizneset e mëdha që marrin shuma mbi 35 milionë lekë, ne 6.1%, kurse për bizneset e vogla interesat arrijnë deri 7.4%.

Kurse interesat për kreditë në euro janë rritur nga 6.4% në tremujorin e parë të vitit nga 5.4% që ishte një vit më parë. Sipas bankës kjo rritje e interesave ka ardhur për shkak të rritjes së normës bazë të interesit nga Banka Qendrore Evropiane. 

Sa i takon kushteve të kredive, bankat janë treguar më të kujdesshme ndaj rreziqeve thuhet në raport dhe një nga elementët që kanë shtrënguar në dhënien e kredisë ishte kushtëzimet në marrëveshjet e kredisë, duke dhënë kredi në madhësi më të ulta se një vit më parë. 

Megjithatë, në tremujorin e tretë të vitit, bankat perceptuan një situatë makroekonomike më të favorshme dhe një perspektivë optimiste për treguesit kryesorë makroekonomikë.

M.Q./KT/Shqiptarja.com

TAG:
• banka e Shqiperise
• kredi