Siri, vritet gazetarja japoneze
viktima e katërt nga fillimi i konfliktit

DAMASK- Ministria e Jashtme japoneze ka konfirmuar zyrtarisht vdekjen në Aleppo të gazetares Mika Yamamoto, 45 vjeç. Identifikimi është kryer nga një koleg që gjendej së bashku me të, Kazutaka Sato, i cili ka bërë të ditur se gazetarja është goditur gjatë një shkëmbimi zjarri mes rebelëve dhe ushtarëve sirianë.

Yamamoto është gazetarja e parë japoneze dhe e katërta në total që humb jetën në konfliktin në Siri. Ajo punonte për agjencinë e pavarur të shtypit “Japan Press” dhe ishte një veterane e gazetarisë së luftës, me eksperiencë në Afganistan dhe Irak, ku në vitin 2003 shpërtoi mrekullisht nga bombardimi i “Palestine Hotel” të Bagdadit nga një tank amerikan. Reportazhi që krijoi mbi atë eksperiencë e bëri të fitonte çmimin Vaugh-Ueeda, më i larti për gazetarët në Japoni.

Në një video të publikuar online, rebelët deklaruan se Yamamoto është vrarë në Aleppo nga ushtarët e presidentit Bashar Assad ndërsa uruan që vdekja e saj të bindë komunitetin ndërkombëtar të ndërhyjë. “Meqënëse gjaku sirian nuk i shtyn të veprojnë, shpresoj që t’i shtyjë gjaku i njerëzve të tyre”, tha komandanti i rebelëve.

Në të vërtetë, siç shpesh ndodh në momente kaosi, nuk është shumë e qartë se nga ka ardhur plumbi që i ka marrë jetën gazetares, ndonëse dyshimet më të mëdha bien mbi trupat e Assad.

Yamamoto është dërguar në spital nga vëzhguesit sirianë për të drejtat e njeriut, organizatë e opozitës në mërgim me seli në Britaninë e Madhe. Këta të fundit shtuan se bashkë me gazetaren japoneze ndodheshin edhe tre reporterë të huaj – dy arabë, nga të cilët një libaneze dhe një turk – që tashmë rezultojnë zhdukur.

(im/shqiptarja.com)