Situata ekonomike pas COVID-it/ Basha prezanton katër prioritetet e tij kur të bëhet kryeministër

TIRANË- Kreu i Partisë Demokratike, Lulzim Basha ka prezantuar katër prioritete e tij dhe të demokratëve sa i përket ekonomisë.  

Fuqizimi i biznesit të vogël, hapja e bizneseve të reja kryesisht nga të rinjtë dhe punësimi i tyre, mbështetja e bujqësisë janë katër çështjet kryesore për të cilat Basha shprehet se do të jenë në fokusin e tij kur të bëhet kryeministër, të cilat vijnë si rezultat i dëmeve që u janë shkaktuar bizneseve në COVID-i.

"Për shkak të situatës ekonomike që po kalon vendi dhe rritjes së vazhdueshme të taksave, është bërë tejet i vështirë suksesi i bizneseve të konsoliduara, ndërsa për hapjen e bizneseve të reja është thuajse e pamundur. Lufta për mbijetesë ka bërë që shumë biznese të mbyllin vende pune, ku më të prekurit janë të rinjtë. Në këtë kuadër, krijimi i mundësive për të hapur një biznes, fuqizimi i bizneseve të vogla, rritja e mundësive për punësim është një nga synimet kryesore të Partisë Demokratike. Në planin tonë, ne planifikojmë garanci shtetërore ndaj institucioneve të mikrokreditit për të ndihmuar ato në kreditimin e ndërmarrjeve të vogla dhe të mesme, të drejtuara kryesisht nga të rinjtë, ndërsa me prioritet do të konsiderohet dhe mbështetja për bujqësinë. Programi ekonomik i Partisë Demokratike ka në fokus të tij uljen e barrës fiskale sidomos për bizneset e vogla, mbështetjen me subvencione ndaj fermerit me të paktën 100 milionë euro në vit, eleminimin e procedurave të tepërta burokratike dhe krijimin e kushteve për konkurrencën e lirë e të ndershme nëpërmjet një procesi dialogu me të gjithë aktorët kryesorë të tregut financiar", tha Basha.

Këtë deklaratë, numri një i demokratëve i bëri gjatë takimit me drejtuesit e Shoqatës Mikrofinanca Shqiptare,  Arlinda Muja Presidente dhe Brunilda Isaj Sekretare e Përgjithshme.

"Ndamë shqetësimin për mungesën e likuiditetit, krizën ekonomike për tejkalimin e së cilës nëse nuk veprohet shpejt do të vërë në pozitë të vështirë sistemin bankar dhe veçanërisht institucionet e mikrokreditit, pasi do të rritet pamundësia e qytetarëve dhe bizneseve për t'i shlyer kreditë. Vonesa në ripagimin e kësteve dhe shtyrjet e detyruara kanë ulur me 60% arkëtimet vetëm në institucionet e mikrokreditit. Deri më sot janë 175.000 vende pune të krijuara nga bizneset e financuara prej institucioneve të mikrokreditit, ku vetëm gjatë 2019 këto institucione kanë mbuluar 68% të të gjithë kërkesave për kredi në vend", përfundoi Basha.

B.K./Shqiptarja.com

TAG:
• lulzim basha
• PD
• koronavirusi ne shqiperi