'S'jemi në presion', Pioli mbron Milanin! Hernandez i prerë: Rezultati pengu i madh i ndeshjes

Për të dytën javë rradhazi në Seria A Milan ka dështuar të fitojë, duke humbur terren në luftën për titull. ‘Djalli’ barazoi pa gola kundër Torinos dhe tani e sheh veten si kryesues me 2 pikë më shumë se Interi, por zikaltërit kanë një ndeshje më pak. Meritë për dy pikët e humbura të Milanit ka padiskutim portieri shqiptar i Torinos Etrit Berisha, i cili është vlerësuar me notën e lartë 7.5 pas ndeshjes.

Zhgënjimi dukej qartë te Milan, me trajnerin Pioli i cili ka thënë se ‘po gabojmë prej 2-3 javësh’, por ka mohuar që skuadra të jetë nën presion. Sakaq mbrojtësi Hernandez ka qenë më i prerë, pasi francezi tha se ‘rezultati është pengu i madh i kësaj ndeshje’, ndërsa u kujdes të theksonte se ‘kundërshtarët po japin maksimumin ndaj Milanit’.

Ndërkohë në La Liga Barcelona siguroi tre pikët në ekstrem të lojës kundër Levantes. Goli i sulmuesit Luk de Jong në shtesë i dha fitoren 3-2 katalanasve, të cilët jo vetëm që u rikthyen në vendin e dytë, por edhe mbajnë matematikisht gjallë shpresat për titull.

Në Premier League superpërballja e titullit mes Manchester City-t dhe Liverpool përfundoi pa fitues me shifrat 2-2. ‘Qytetarët’ e Guardiolës kaluan dy herë në avantazh, por Liverpool ia arriti të baraspeshonte. Ky rezultat e mban City-n në vendin e parë me 1 pikë më shumë kur kanë mbetur edhe 7 javë kampionat.

Ne.k./r.k./Shqiptarja.com

TAG:
• stefano Pioli
• Theo Hernandez
• Seria A
• Torino
• Milan