PS dhe PD nuk kanë gjetur dakordësinë për të shtyrë afatet për komisionin e reformës Territoriale. Në konferencën nga selia blu, kreu i PD akuzoi mazhorancën se duan ta miratojnë reformën pa opozitën dhe sipas tij gjithçka është urdhëruar nga Edi Rama.

“PS kërkon ta miratojë pa PD. Ne konstatojmë se po ndërpritet procesi. Nuk kanë përfunduar konsultat, të parashikuara dhe miratuara sipas rregullave. Boçi ka bërë një punë të shkëlqyer, serioze dhe sapo Boçi kërkoi atë që ne kemi patur kusht, që ky komision të asistohet nga kongresi i autoriteteve lokale dhe rajonale të KiE që është edhe instituti me ekspertizën më të madhe në këtë fushë. Papritmas, Rama urdhëron komisionin që të shkojnë në mënyrë të njëanshme. Ne kemi platformën tonë, por ne e besuam dhe vlerësuam që të kemi një këshilltar të mençur që ka të gjithë ekspertizën europiane të reformave territoriale për të bërë më të mirën”, tha Berisha.

Berisha thotë se janë kundër variantit të prezantuar dje nga bashkëkryetari Arbjan Mazniku për uljen e numrit të bashkive dhe ndarjen e territorit në rajone.

“PS do të shkojë veçmas, ajo është zgjidhje e tyre. Ne qëndrojmë kundër variantit të paraqitur nga ata, kundër ekzistueses, dhe do bëjmë gjithë përpjekjet për të kundërshtuar këtë reformë”, vijoi Berisha.

Në kushtet kur palët kanë gjetur dakordësinë për të shtyrë afatin për komisionin e reformës Zgjedhore, Berisha u pyet nga gazetarët nëse në tryezë kanë diskutuar edhe një nga kërkesat e protestuesve për sistem proporcional kombëtar me lista të hapur

“Rama është i vendosur të mos pranojë asnjë kërkesë të protestës rinore qytetare. Ne i kemi mbështetur të gjitha kërkesat e tyre. Këtu ka një dallim të madh mes nesh dhe atyre”, tha Berisha.

Lajmi në përditësim...

Rendit zhvillimet sipas orarit:
Ora 13:18
Deklaratat e ministres serbe për spastrimin etnik në Kosovë, Berisha: Ka shprehur mendimin e padronit të Ramës, të shpallet non grata

1784200893_saliberisha.jpeg

Sali Berisha akuzoi qeverinë se nuk ka reaguar ndaj deklaratave të ministres serbe Snezhana Paunoviç për spastrimin etnik në Kosovë. Berisha tha se ajo ka shprehur mendimet e padronit të Edi Ramës, presidentit serb Aleksandër Vuçit. Si përsëriti edhe njëherë qëndrimin e PD për shpalljen e ministres non grata.

“Ka shprehur mendimin e padronit të Ramës, Aleksandër Vuçiç. Të mbash një montër si ajo në kabinet që shpreh keqardhjen se nuk u kompletua spastrimi etnik në Kosovë, do të thotë të kesh vetë atë mendësi. Së dyti, dënoj më forcën më të madhe heshtjen e turpshme, prej vasali të qeverisë shqiptare ndaj deklaratës një ministreje të Beogradit, ndërkohë që shpall non grata qytetarë të Prizrenit pse marrin pjesë në protestë, shpall non grata deputetë të Maqedonisë së Veriut, përfaqësues të shqiptarëve, në aktin më të turpshëm, më vetposhtërues nuk guxon të shpallë non grata dhe ai ministër i jashtëm, turp i të gjitha kohërave që nuk guxon të thotë një fjalë ndaj ministres monstër që kërkonte spastrim etnik të të gjithë shqiptarëve nga Kosova. Ky qëndrim dëshmon fytyrën e vërtetë të regjimit të Tiranës, regjim vasal ndaj Beogradit”, tha Berisha.

SI.E./Shqiptarja.com