Emigrimi masiv i popullsisë në zonën veriore të vendit, vetmia mes të cilës jetojnë dhjetëra të moshuar në fshatrat e thellë, kryesisht në Pukë e Fushë Arrëz, ka bërë që fenomenin shqetësues ta ndjejë edhe Kisha Katolike.

Frat Andreas Valterman është një prift gjerman, prej vitesh ka bërë të pamundurën që fshatrat e zonës ku ai shërben, të jenë të banuara duke ofruar bursa për studentët, ndihmuar në krijimin e fermave dhe ka ndërtuar dhjetëra banesa, të cilat sot fatkeqësisht kanë mbetur bosh.

Kleriku katolik thotë se mungesa e infrastrukturës dhe mundësia e një pune i ka detyruar të rinjtë të ikin dhe në një pjesë të madhe, edhe gjithë familjen.

Drama sociale me të cilën po përballet veriu i vendit ka sjellë edhe rënien e shërbimit arsimor, atë shëndetësor dhe shërbimeve të tjera komunitare, çfarë po detyron dhe të mbeturit ende atje të mendojnë largimin.

Për priftin gjerman, jeta në vendlindje është shumë më e qetë se në emigrim. Ndaj, mes zymtësisë dhe dilemave që e shoqërojnë çdo ditë në shërbesat e tij, Frat Andreas ka edhe një thirrje, që e bërë nga një i huaj kumbon fort.