Në fshatin fshatin Hinkë të Dimalit janë kultivuar rreth 74 hektarë me mandarina, por këtë vit fermerët janë në prag familementi. Arsyeja kryesore është mungesa e tregut dhe çmimet shumë të ulëta, ndërkohë që mungon edhe fuqia punëtore. Edhe pse prodhimi është cilësor, çmimi i mandarinave ka rënë në 50 lek për kg. Ndërkohë për të dalë me leverdi çmimi duhej të ishte të paktën 80 lekë/kg.

“Prodhimi sivjet është i mbarë, më cilësor nga të gjitha vitet e mëparshme, por po na penalizon çmimi i ulët, sidomos në fillim të sezonit. Ne jemi dobët me tregun”, shprehet një fermer.

Pikat e grumbullimit e marrin me çmim tejet të ulët, sa fermerët hyjnë në borxhe për të mbuluar shpenzimet, pasi pemëve u shërbejmë me spërkatje, vaditje, krasitje dhe plehërim.

“Kemi hyrë në borxhe. Në behar shkojmë në Greqi të punojmë për të nxjerrë shpenzimet e kultivimit të mandarinave – pleh, ilaçe, spërkatje”, thotë fermeri.

Ata theksojnë se përdorimi i ilaçeve është brenda normave të lejuara dhe prodhimi i tyre është cilësor.

“Ne nuk hedhim pesticide, kemi bërë analiza. Produkti është i pastër”, thekson fermeri.

Fshati Hinkë, i vendosur në Poshnje të Dimalit, pjese e qarkut të Beratit, ka një traditë 20-vjeçare në kultivimin e agrumeve. Fillimisht tregtia ka qenë e mbarë por në fund të vitit 2024 dhe fillim 2025, disa ngarkesa mandarinash u gjetën me mbetje të pesticideve të ndaluara, si Phosmet dhe Chlorpyrifos.

Tre persona – një fermer, një grumbullues dhe një inspektor – u arrestuan nga Prokuroria e Beratit për shkelje të rregullave mbi lëndët helmuese dhe shpërdorim detyre. Një pjesë e ngarkesave u kthye nga Kroacia për prani të lartë të pesticideve. Ky skandal, përveç riskut për shëndetin e konsumatorit, ndikoi në rënien e besimit produkteve shqiptare dhe ka rënduar më tej situatën e fermerëve, përfshirë ata të fshatit Hinkë.