Pirro Dhima ka paraqitur dorëheqjen nga posti i këshilltarit special në Ministrinë e Sportit në Greqi, pas shpërthimit të skandalit të dopingut ku është përfshirë vëllai i tij, Odhise Dhima.

Sipas mediave greke, dorëheqja e kampionit olimpik nuk është pranuar nga zëvendësministri i Sportit, Janis Vrutsis.

Vendimi i Pirro Dhimës u mor për arsye të ndjeshmërisë dhe dinjitetit personal, raporton Protothema. Megjithatë Vrutsis nuk e pranoi dorëheqjen e tij, me argumentin se përgjegjësia familjare nuk ekziston në këtë rast. “Çfarë lidhjeje ke ti me këtë çështje?”, raportohet t’i jetë përgjigjur ai.

Pirro Dhima vazhdon të mbajë postin e sekretarit special në Federatën e Peshëngritjes. Peshëngritësi i njohur i ka sjellë Greqisë tri medalje olimpike ari dhe një medalje bronzi.

58-vjeçari Odhise Dhima u arrestua mëngjesin e së enjtes në një zonë të Atikës, për shkelje të ligjit kundër dopingut, pas një hetimi disa mujor të zhvilluar në bashkëpunim me Organizatën Greke Kundër Dopingut (EOKAN) dhe Organizatën Kombëtare të Barnave (EOF).

Ai akuzohet se furnizonte sportistët me substanca të ndaluara dopingu. Mes rasteve që përmend policia është edhe ai i djalit të tij të mitur, të cilit dyshohet se i dha një substancë të ndaluar gjatë një gare.

Në mostrën e urinës së sportistit të mitur u zbulua oksandrolon, një substancë që figuron në listën e substancave të ndaluara të Agjencisë Botërore Antidoping (WADA).

Sipas policisë greke, Dhima dyshohet se e shfrytëzonte rolin e tij si trajner peshëngritjeje për t’i furnizuar sportistët me substanca të ndaluara dhe për t’ua administruar ato, të paktën që prej prillit të vitit 2024.

Gjatë kontrolleve në banesën e 58-vjeçarit dhe në ambiente sportive në Atikë, policia gjeti dhe sekuestroi 871 njësi preparatesh farmaceutike të paligjshme dhe substancash dopingu, në formë tabletash dhe ampulash. U sekuestruan gjithashtu 17 kartela sportistësh, shënime të shkruara me dorë, një telefon celular dhe 15 mijë euro.

Sipas Organizatës Kombëtare të Barnave të Greqisë, preparatet e sekuestruara nuk kanë autorizim për t’u tregtuar në tregun grek dhe konsiderohen të dëmshme për shëndetin e personave që i përdorin.

Rendit zhvillimet sipas orarit:
Ora 17:15
U arrestua për doping në Greqi, Odhise Dhima thyen heshtjen nga paraburgimi: I kërkoj falje vëllait tim Pirro, e kam vënë në pozitë të vështirë!

“I kërkoj falje vëllait tim Pirro Dhima dhe familjes sime”. Këto janë fjalët e para të Odhise Dhimës nga paraburgimi, pas arrestimit të tij në Greqi për skandalin e dopingut në peshëngritje. Në një deklaratë për televizionin grek MEGA, 58-vjeçari kërkon ndjesë për pozitën e vështirë në të cilën ka vendosur familjen, por mohon se i ka dhënë qëllimisht substanca anabolike djalit të tij të mitur. Ai jep shpjegime edhe për preparatet e sekuestruara në banesën e tij, duke pretenduar se shumica janë të ligjshme.

“I kërkoj falje vëllait tim Pirro Dhima dhe familjes sime, që i kam vendosur në një pozitë të vështirë për shkak të sjelljes sime të pamenduar. I kërkoj falje të gjithë qytetarëve që e kanë dashur Pirro Dhimën. Kam dy vjet që nuk merrem më me stërvitjen e sportistëve. Ndihem i shkatërruar nga dezinformimi kundër meje, kur arrijnë deri në pikën që të më akuzojnë se i kam dhënë qëllimisht anabolikë djalit tim të mitur. E vërteta, që del nga një vendim gjykate, është se është përdorur një suplement ushqimor i ligjshëm, në paketimin e të cilit nuk përmendej substanca anabolike. Kjo u pranua nga Këshilli i Lartë për Zgjidhjen e Mosmarrëveshjeve Sportive (ASEAD), i përbërë nga gjyqtarë të rregullt, i cili më atribuoi pakujdesi. Preparatet e gjetura në shtëpinë time janë të ligjshme, përveç disa prej tyre, për të cilat do të provoj se i përdor për arsye mjekësore" ka deklaruar ai

Odhise Dhima, ish-trajner i ekipit kombëtar të peshëngritjes, akuzohet për furnizim, ruajtje dhe trafikim të paligjshëm të substancave anabolike. Sipas hetimeve të autoriteteve greke, ai dyshohet se ka furnizuar sportistë të rinj me substanca të ndaluara, ndërsa mes rasteve që po shqyrtohen është edhe ai i djalit të tij të mitur.

Gjatë kontrolleve në banesën e 58-vjeçarit dhe në ambiente sportive në Atikë, policia sekuestroi 871 njësi preparatesh farmaceutike dhe substancash dopingu. U gjetën gjithashtu kartela sportistësh, shënime të shkruara me dorë dhe 15 mijë euro.

Dhima ka kërkuar kohë për të përgatitur mbrojtjen dhe pritet të paraqitet para hetuesit të hënën, më 16 nëntor