Sonte ndeshja Izrael-Shqipëri, kuqezinjtë në kërkim të mrekullisë! Reja me dilema për Asllanin e Uzunin, si pritet të rreshtohet Kombëtarja

Kombëtarja shqiptare do të luajë sonte në Tel Aviv, një ndeshje të rëndësishme pas asaj me Poloninë në kualifikueset e Botërorit. Për të synuar vendin e parë në Ligën e Kombeve duhet patjetër fitorja me Izrealin, ndërsa më pas do mendohet për Islandën më 27 shtator.

Skuadra ka mbërritur që ditën e djeshme në Tel Aviv, ndërsa mbrëmë në stadiumin “Bloomfield” mbajtën edhe stërvitjen e fundit. Ndeshja do të nisë në orën 20:45.

Përveç mbrojtësve Gjimshiti, Kumbulla dhe Dermaku kombëtares në këtë sfidë i mungojnë edhe mesfushorët Keidi Bare dhe Endri Çekiçi. Pa mungesa nuk është as Izreali, pasi lojtari më i mirë i tyre Zahavi është i përjashtuar.

Sfida e parë e luajtur në Tiranë në muajin qershor u fitua 1-2 nga Izraeli, ndërsa përballja e kthimit të shtunën do gjykohet nga një katërshe arbitrash nga Lituania me kryesor Donatas Rumšas.

Formacioni i mundshëm:

Sulmuesi Myrto Uzuni është stërvitur pjesërisht për shkak të problemit muskulor. Stafi mjekësor duhet ende të vendosë nëse do të jetë i gatshëm për sfidën e sotme.

Reja ka provuar që ta nisë me këtë formacion:

Në portë do të luajë Tomas Strakosha, që ka fituar duelin me Berishën.

Në qendër të mbrojtjes Ismajli dhe Veseli, ndërkohë në krahë, djathtas Balliu dhe majtas Hysaj.

Përpara tyre pritet të rreshtohen Gjasula, Abrashi dhe Laçi, megjithatë një dyshim është që në vendin e tij mund ta nisë edhe Kristjan Asllani.

Ndërsa në rolin e tij prej fantazisti është Nedim Bajrami, që do të mbështesë dy sulmuesit, Armando Broja dhe Sokol Cikalleshi.

SI.E./Shqiptarja.com

TAG:
• kombetarja shqiptare
• Liga e Kombeve
• izraeli