TIRANE-PS, opozita në Kuvend dhe PD-LSI janë në limitin e kohës për të gjetur dakordësinë për zgjedhoren brenda 31 majit, pasi sot është dita e fundit. Pas takimit disaorësh dje që u mbyll me ndasi, sot pasdite Këshilli mblidhet sërish nën presionin ndërkombëtar.

Disa orë para takimit, Presidenti Ilir Meta ka dy kërkesa për tryezën e reformës zgjedhore, e para që ndryshohet sistemi, pra që listat të jenë të hapura dhe e dyta që të sanksionohet zgjedhja e Presidentit nga populli.

"Ndaj sot të gjithë presin nga palët të mbajnë premtimin e tyre për konsensus. Jo vetëm kaq, pasi edhe kjo është shumë pak.

Të mos kenë më frikë nga vota e lirë dhe e barabartë e qytetarëve të vendit dhe t'u japin mundësi të shprehen, jo vetëm për partitë, por edhe për deputetët që këta të mos heshtin më në Parlament e të vazhdojnë të ngrenë duart për ligje e politika që shtojnë varfërinë në vend dhe favorizojnë vetëm një grusht oligarkësh dhe politikanësh që kurrë s'duan të japin llogari dhe të mbajnë përgjegjësi.

Dhe për të dhënë shembullin i pari ju ftoj të vendosni edhe zgjedhjen e Presidentit nga populli, që në këtë vend Presidenti të mos këtë më detyrime ndaj asnjë partie, por vetëm ndaj Kushtetutës, qytetarëve dhe Republikës" shkruan Meta.

Kërkesat e Presidentit përmes Facebook-ut dhe jo institucionalisht, aq më tepër ditën e fundit të afatit, kur pritet finalizimi i marrëveshjes duken më tepër si retorikë. Tryeza e Reformës Zgjedhore në thelb ka rekomandimet e OSBE-së, pavarësisht këmbënguljes së Rudina Hajdarit për ndryshimin e sistemit, por që nuk ka gjetur dakordësinë e PS,PD dhe LSI.