Nis me debate Komisioni Hetimor për Shëndetësinë, opozita: Ndreca në konflikt interesi! Rama, 5 ministra e ish-ministra dëshmitarë, thirren brenda 10 qershorit

Deputeti i PS-së dhe anëtar i Komisionit Hetimor për dy koncesionet në shëndetësi, Petro Koçi ka vlerësuar kërkesat e opozitës, por tha se roli i drejtueses, në këtë rast Albana Vokshi është shumë i rëndësishëm.

Ai tha se komisionet në të shkuarën kanë qenë një njollë e zezë e parlamentit, ndërsa u shpreh se fundi i këtij komisioni nuk duhet të jetë si të tjerat, ku prezantohen dy raporte dhe gjithë kohës ka kacafytje mes palëve.

“Gjykoj që kërkesa që ka bërë opozita është dinjitoze. Janë çështje të rëndësishme që kanë krijuar sensibilitet në opinionin publik. Është një nga komisionet hetimore me arsye të qëndrueshme.

Fillimi i punimeve të këtij komisioni, nuk është i mbarë. Pak a shumë është përsëritje e një historie. Komisionet janë njollë e zezë e parlamentit dhe këtu janë thirrur skifterët e palëve.  Këtu duhet të gjykohet urtësia e gjykimit. Ndaj roli i moderatorit është i rëndësishëm.

Mendoj që në rastin që Kuvendi ju ka zgjedhur juve si kryetare, keni përsipër një përgjegjësi të madhe. Nuk do të ishte e udhës që përfundimi i këtij komisioni të jetë e njëjta histori. Pra raporte dy palëshe dhe kacafytje në gjithë procesin dhe procedurat e këtij komisioni.

Etika dhe rregullsia në këtë komision, varet nga ai që drejton. Do ju ftoja që të ishit në përputhje me mandatin e këtij komisioni. Duhet të kërkojmë të vërtetën për çështje të rëndësishme. Paracaktimi sjell zhvillime të mbrapshta”, tha ai.

Kryetarja e Komisionit të Shëndetësisë, Albana Vokshi tha se mes dëshmitarëve që do thirren për të dëshmuar lidhur me hetimin e dy koncesioneve, do jetë edhe kryeministri Edi Rama. Pyetja e dëshmitarëve sipas planit të veprimit të komisionit do jetë deri më datë 10 qershor.

Një deklaratë e Ina Zhupës se Plarent Ndreca, nënkryetari i Komisionit Hetimor për Shëndetësinë, është në konflikt interesi, ka ngjallur debate të forta.

Ndreca i tha Zhupës se nuk është e aftë profesionalit të gjykojë për prezencën e tij në komision, ndërsa kjo deklaratë solli reagimin e kryetares Albana Vokshi.

Kjo e fundit i tha që nuk duhet të përdorë fjalë jo etike ndaj kolegeve deputete, ose në të kundërt do i ndërpresë fjalën.

Ndreca: Nuk e kuptoj insistimin tuaj mbi prezencën time, se di ku e keni merakun, duket që ke një merak me mua. Duhet të ta marrë mendja që profesionalisht jam shumë më i aftë se t’i për ta kuptuar këtë gjë. Nga t’i nuk pres këshilla se si zbatohet ligji.

Vokshi: Nuk mund të përdorini këtë lloj fjalori për kolegen, qëndroni te argumenti, s’ka nevojë të vini kandarin e profesionalizmit. Ju ndërpres kur keni fjalor jetik.

Ndreca: Qetësohu, etika ime nuk vlerësohet nga ti.

Vokshi: Jam unë që e vlerësoj, nuk iu lë të vazhdoni diskutimin kur përdorni sjellje dhe gjuhë jo etike

Ndreca: Si s’do më lejosh, si zhurmuese.

Vokshi: Nëse përdorni fjalor jo etik ose ju heq fjalën.

Ndreca: Ti se kupton ca është fjalë jo etike.

Vokshi: E kuptoj nuk e kuptoj unë, kjo nuk është çështje e komisionit. Përmbahu kodit të etikës.

Klevis Xhoxhi është zgjedhur sekretar i Komisionit hetimor për koncesionet në Shëndetësi.

Të 15 anëtarët e komisionit votuan pro, asnjë kundër dhe asnjë abstenim.

Deputetja e opozitës, Ina Zhupa ka kërkuar në Komisionin Hetimor të Shëndetësisë, që t’i drejtohen me një kërkesë SPAK, për të pyetur nëse nënkryetari i PS, Plarent Ndreca ka qenë avokat i personave të akuzuar për koncesionin e sterilizimit. Sipas Zhupës, ai është në konflikt interesi sepse ka qenë avokat i Arben Gjatës.

Ndërkohë, Ndreca iu përgjigj duke pranuar se ka qenë avokat, por ai theksoi se kjo s’ka lidhje me komisionin.

Zhupa: Pranuat që keni qenë vetë avokat i një prej të akuzuarve, pranuat që jeni në konflikt interesi. Kam një kërkesë procedurale për të zgjidhur konfliktin e interesit. Le t’i drejtohemi SPAK, ta pyesim nëse Ndreca ka qenë avokat i personave të interesuar dhe qartësojmë edhe pozicionin e tij. PS ka mjaftueshëm resurse, deputetë që nuk kanë konflikt interesi me këtë çështje që mund të jenë nënkryetar të komisionit, që Ndrecës mos t’i krijohen probleme dhe komisionit.  Është mirë të sqarohemi para se të nisim procesin e hetimit.

Ndreca: Nga pikëpamja e diplomës nuk pres të më këshillojë Zhupa. Nuk ka nevojë me pyet të tjerë. Unë e thash kam qenë avokat jo vetëm i atij, por edhe i disa të tjerëve që bëjnë pjesë nga krahu juaj. S’ka lidhje me këtë komision.

Debate të shumta janë zhvilluar mes kryetares së Komisionit Hetimor për Shëndetësinë, Albana Vokshit dhe nënkryetarit të PS, Plarent Ndreca. Ky i fundit ka kërkuar disa herë fjalën, por Vokshi i thotë se do flasë pasi t’ia japë ajo fjalën pasi drejton komisionin.

Por sipas Ndrecës, ai është bashkëkryetar dhe komisioni bashkëjetohet, kështu ai mund ta marrë fjalën kur e kërkon.

Ndreca tha se nuk qëndron në komisione ku ‘dhunohet’ procedura e rregullt ligjore.

Vokshi: Kur t’ua jap unë fjalën. Se merrni dot pa radhë.

Ndreca: Dua t’iu kujtoj, bazuar në nenin 10  të ligjit, ky komision bashkëdrejtohet, prandaj unë e marr fjalën. Ky komision bashkëdrejtohet. Ju jeni spiker, jeni e para mes të barabartëve.

Vokshi: Ka një kryetar dhe në mungesë të kryetarit drejton zv.kryetari.

Ndreca: Pse e dhunoni fjalën time, a mund ta mbaroj.  Mos më ndërprisni. Nëse doni ta vijoni kështu, nuk marr pjesë në këto lloj komisione që shkelin haptazi dhe dhunojnë procedurën e rregullt ligjore.

Vokshi: Nëse detyra juaj është të pengoni punën, më vjen keq nuk do ja dilni.

Ndreca: Ju vijoni me argumente partiak, ky komision është për të thënë një gjë, për të vërtetën. Nuk jemi për të dëgjuar Rithemelimin edhe njëherë në një formë tjetër.

Deputetja e opozitës, Ina Zhupa ka hedhur akuza ndaj nënkryetarit të PS në Komisionin Hetimor të Shëndetësisë, Plarent Ndrecës, duke thënë se ka qenë avokat i një prej të akuzuarve (Arben Gjata) për koncesionin e sterilizimit.

Përgjigja i erdhi nga Ndreca, i cili tha se nëse do ishte për konflikt interesi, është kryetarja e Rithemelimit, Albana Vokshi që është në konflikt. Pasi ajo ka qenë një prej kallëzueseve të këtyre koncesioneve.

Zhupa: Nuk kemi paragjykuar, kryetarja citoi kërkesën që ka ardhur nga PD dhe i referohet auditit të kryer nga KLSH. Sipas KLSH, nga viti 2015-2018, janë 930 mln lekë për shërbime të pakryera vetëm për check up. Kjo shumë është katërfishuar deri në 2024. Janë paratë e taksapaguesve. Kjo duhet t’iu shqetësojë. Atyre që s’u pëlqejnë të dhënat të sqarojnë a kanë konflikt interesi që ndodhen në këtë komision. Për mua ka konflikt interesi se ka qenë avokati i njëri prej të akuzuarve në koncesion. Të sqarojë Ndreca pozicionin e tij dhe të vazhdojmë punën për interesin publik.

Vokshi: Secili të firmosë një deklaratë që s’kanë konflikt interesi për çështjet që do trajtohen dhe dëshmitarët që do thirren.

Ndreca: Do ishte mirë të kuptojmë që kush është në konflikt interesi, unë apo kryetarja, që është kallëzuese.  Unë nuk kam mbrojtur profesorin në çdo segment procedural. Nëse do kishte vend për konflikt, do ishte kryetarja që është kallëzuese se ka krijuar bindje për rrethanat që janë objekt hetimi.

Ka nisur mbledhja e Komisionit Hetimor për koncesionet në Shëndetësi, Check up dhe Sterilizimi. Mbledhja nisi me debate mes kryetares së opozitës, Albana Vokshi dhe nënkryetarit Plarent Ndreca.

Vokshi tha se këto dy koncesione janë abuzive, ndërsa Ndreca kërkoi që mos të bëhen deklarata partiake por të zbatohet Kushtetua, pasi janë mbledhur për të hetuar dhe s’mund të dalin në konkluzione pa mbaruar punën.

Vokshi: Shihet si një mjet për të nxjerr në pah situatën ku ndodhet sektori shëndetësisë. Situata sipas denoncimeve është e rënduar me mungesa në barna, kura, pa mundësi për të bërë dhe analiza e ndërhyrje kirurgjikale në disa raste. Shqiptarët paguajnë rreth 60% të shërbimit shëndetësor nga xhepi. Po i them se shqiptarët nuk po e marrin më shërbimin shëndetësor në publik, nuk mundet ta marrin për shkak të 4 koncesioneve që janë dhënë dhe janë kthyer në gropa të zeza. Arrijnë vlerën 200 mln euro, nëse i referohemi dy kontratave të firmosura.

Ndreca: Të ikim ne dhe vazhdoni konferencën. Të ikim ne

Vokshi: Të lutem mbylle. Nëse do ta nisni kështu...

Ndreca: A jemi mbledhur për të konstituar.

Vokshi: Po shpjegoj për publikun ca është ky komision, pse është mbledhur dhe çfarë të trajtojë. Mos u shqetësoni

Ndreca: Nuk shqetësohem, t’i mund ta bësh çdo herë.

Vokshi: Mos më ndërhyni pa filluar mirë komisioni. Po informoj ca është dhe do kaloj direkt te rendi i ditës.

Vokshi: Vlera e dy koncesioneve kalon 200 mln euro. Si nga check up dhe sterilizimi, nga gjithë qytetarët, ekspertët është dëshmuar se kanë qenë të panevojshme dhe abuzuese. Është korrupsion në nivelet më të larta të qeverisë. Uroj të mos bëheni mburojë e këtij korrupsioni dhe të përdorini kartonët tuaj kundër interesit publik.

Ndreca: Referuar deklaratave del e qartë që ju keni paragjykuar veprimtarinë, nëse ju vijoni më tutje të konkludoni pa filluar puna e komisionit, keni fyer parim kushtetues mos paragjykimin e një çështje që është arsyeja përse ne jemi ngritur për te hetuar. Nëse vijojmë me deklarata partiake ndërkohë që ne jemi këtu për të kryer një proces të rregull ligjor, e kemi nisur me këmbë jo të ndarë. Ju lutem respektoni parimet kushtetuese.