Këshilli i Mandateve dhe Imuniteteve do mblidhet në orën 19:00 për të shqyrtuar kërkesën e Prokurorisë për heqjen e mandatit të Saimir Tahirit. Me urdhër të kryetarit të Kuvendit, Gramoz Ruçi, fati i Tahirit për autorizimin e Prokurorisë për ta arrestuar ose jo, do vendoset pikërisht sot. 

Mandatet do hartojnë një raport për këtë çështje të cilin do t'ia adresojnë Kuvendit në seancë plenare. Votimi për heqjen ose jo të mandatit të Tahirit do jetë i fshehtë dhe pritet të zhvillohet javën e ardhshme në datën 25 tetor.  

Procedura që do ndjekë Kuvendi
Pas marrjes së kërkesës nga Prokuroria e Përgjithshme, Kryetari i Kuvendit Gramoz Ruçi, në respekt të neneve 13 dhe 118 të Rregullores së Kuvendit duhet të thërrasë Këshillin për Rregulloren, Mandatet e Imunitetet. 

Me kërkesë të Kryetarit të Kuvendit, Këshilli shqyrton kërkesën për dhënien e autorizimit nga Kuvendi për fillimin e ndjekjes penale ose arrestimin e një deputeti. Tahiri për të cilin kërkohet dhënia e autorizimit, lajmërohet për kërkesën e bërë dhe dokumentet që e shoqërojnë atë, si dhe i bëhet e ditur koha në të cilën do të mbahet mbledhja. Deputeti ka të drejtë të paraqesë në Këshill, me shkrim ose me gojë, shpjegimet dhe vërejtjet e tij rreth çështjes.

Në përfundim të shqyrtimit, Këshilli, brenda 4 javëve, harton një raport për në seancë plenare, në të cilin rekomandon rrëzimin ose miratimin e dhënies së autorizimit për fillimin e ndjekjes penale ndaj deputetit. Shqyrtimi i kërkesës për dhënien e autorizimit për fillimin te ndjekjes penale ose arrestimin e një deputeti vendoset si pikë e parë e rendit të ditës të seancës pasardhëse, e cila parashikohet për të mërkurën, në 25 tetor. 

Në seancë plenare fjala i jepet në fillim deputetit, ndaj të cilit është paraqitur kërkesa, për të dhënë shpjegime ose për t’iu përgjigjur pyetjeve të deputetëve. Raporti i Këshillit nuk është objekt diskutimi. Kuvendi vendos me votim të fshehtë nëse do të jepet ose do të rrëzohet dhënia e autorizimit për arrestimin e Tahirit. Deri në votimin e parlamentit, Tahiri nuk mund të arrestohet. 

Redaksia Online
l.q/Shqiptarja.com