Sot në Pejë, mbledhja e përbashkët e qeverisë shqiptare dhe asaj të Kosovës, marrëveshjet që priten

KOSOVE - Sot në Pejë do të zhvillohet mbledhja e pestë e përbashkët e Qeverisë së Republikës së Kosovës dhe Këshillit të Ministrave të Republikës së Shqipërisë. 

Ceremonia shtetërore e mirëseardhjes do të nisë në orën 10:15. Në mesditë do të nënshkruhen marrëveshjet e arritura, kurse pas gjysmë ore do të ketë një konferencë të përbashkët të të dy palëve. Ndër marrëveshjet kryesore që pritet të arrihen në këtë takim, është ajo për krijimin e lehtësirave doganore mes dy vendeve. Pas zotimit për unifikimin e doganave, Kosova dhe Shqipëria pritet të aprovojnë edhe kërkesën e kahershme të Bashkimit Evropian për heqjen e tarifës së shërbimit të roamingut, në kuadër të telekomunikimit ndërmjet këtyre dy shteteve.

Tarifa e Roamingut nënkupton telekomunikimin dhe shërbimin që qytetarët e përdorin në një vend tjetër nga një qendër e operatorit të telefonisë mobile. Këto tarifa janë kryesisht dyfish më të larta sesa ato që përdoren për telekomunikim brenda një shteti. 

E shndërruar tanimë në një traditë, takimi i përbashkët mes dy qeverive nisi më 11 janar të vitit 2014 kur ato mbajtën takim të përbashkët në Prizren, në vitin 2014, ndërsa një vit më pas, në Tiranë është mbajtur takimi i dytë. Takimi i tretë në Prishtinë, kurse vitin e kaluar është mbajtur në qytetin e Korçës në Shqipëri.

Agjenda e aktiviteteve:

10:15  Ceremonia shtetërore e mirëseardhjes.

10:30  Fillimi i mbledhjes së përbashkët të Qeverisë së Republikës së Kosovës dhe Qeverisë së Republikës së Shqipërisë.

12:00 Ceremonia solemne e nënshkrimit të marrëveshjeve ndërmjet dy qeverive.

12:30  Konferenca e përbashkët për media e Kryeministrit të Kosovës, Ramush Haradinaj dhe Kryeministrit të Shqipërisë, Edi Rama.

13:00  Fotografia e përbashkët e të dy kabineteve qeveritare.

Agjenda e mbledhjes së përbashkët të qeverive

TAG:
• edi rama
• Ramush Haradinaj
• peje
• mbledhja e dy qeverive