Sot do të luhet një nga ndeshjet më të rëndësishme të Kategorisë Superiore në futboll, ku në orën 18:00, do të startojë kryesfida e javës së 20-të mes Partizanit dhe Kukësit. Klubi kryeqytetas ka njoftuar për një akord me policinë, që të mos merret për bazë karta e identitetit të tifozëve për të hyrë në stadium, por, në fakt, uniformat blu e kanë përfshirë këtë element sigurie në njoftimin përkatës, se çfarë lejohet dhe çfarë jo.

Më poshtë njihuni me masat tekniko-organizative për zhvillimin e kësaj ndeshjeje, para, gjatë e deri në përfundim të saj, marrë nga Drejtoria Vendore e Policisë Tiranë. Masat konsistojnë në bllokimin dhe moslejimin e parkimit të automjeteve në disa segmente rrugore, nga ora 15:30 deri në përfundim të aktivitetit.

Më konkretisht:

– Rruga përballë Stadiumit “Selman Stërmasi”.

– Rruga “Gjin Bue Shpata”, nga kryqëzimi me rrugën “Emin Duraku” deri tek kryqëzimi me rrugën “Sulejman Delvina”.

– Rruga “Emin Duraku”, nga kryqëzimi me Rrugën “Gjin Bue Shpata” deri tek rruga përballë stadiumit “Selman Stërmasi”.

– Me qëllim lëvizjen e lirë të tifozëve, do të ketë kufizim të trafikut nga kryqëzimi i rrugës “Muhamet Gjollesha” me Rrugën “Artan Lenja”, përgjatë Rrugës “Muhamet Gjollesha”, Rruga “Sulejman Delvina” deri te stadiumi “Selman Stërmasi”.

Do të kontrollohet stadiumi dhe ambientet e tij.

Në hyrje të stadiumit do të kontrollohen dhe verifikohen identitetet e shtetasve nëpërmjet kartës së identitetit, si dhe nuk do të lejohet futja e sendeve të forta si:

– Shishet e llojeve të ndryshme

– Monedha apo metale të llojeve të ndryshme

– Lëndë piroteknike apo fishekzjarre.

– Çelësa të ndryshëm

– Persona nën efektin e alkoolit.

– Nuk do të lejohen fëmijët nën moshën 16 vjeç pa prezencën e prindit apo të kujdestarit.

d.b/shqiptarja.com