Shqipëria dhe Danimarka janë dy të parat e Grupit I dhe një trepikësh për të dyja ekipet, veçanërisht për kombëtaren tonë, do të përbënte një hap të rëndësishëm drejt kualifikimit për në Evropianin e 2016. Kombëtarja jonë numëron vetëm një fitore përballë Danimarkës në 30.10.1963, me rezultatin 1-0.
Trajneri i kombëtares sonë Gianni De Biasi, i ka bërë thirrje dje ekipit se kërkon fitoren historike, ndërsa nuk ka dashur të zhbilancohet sa i përket formacionit që do të zbresë në “Elbasan Arena”, për të mos i dhënë kundërshtarit asnjë pikë referimi.
Megjithatë nga ajo nisur nga seancat stërvitore, tekniku italian pritet të hedhë në fushë një formacion të rreshtuar me modulin 4-3-2-1, të kujdesshëm në mbrojtje por të gatshëm për të goditur në çdo moment kundërshtarin.
Në portë pritet të jetë si gjithnjë, Etrit Berisha, ndërsa në mbrojtje do të rreshtohen Cana e Mavraj si dhe Elseid Hysaj dhe Ansi Agolli nga krahët. Dilemat më të mëdha De Biasi pritet t’i ketë në mesfushë, ku të sigurtë janë Kukeli e Abrashi, ndërkohë që ka 2 vende për tre kandidatë, Kacen, Lilën e Xhakën. Për sa i përket sulmit, pritet të konfirmohet Bekim Balaj pas supergolit të shënuar në Portugali.
Ndeshja e sotme do të jetë e para zyrtare në stadiumin e ri “Elbasan Arena”, një stadium me standarte moderne dhe i licensuar edhe nga UEFA. Stadiumi i ri u inaugurua të mërkurën, ku të pranishëm ishin mjaft figura të njohura të sportit dhe politikës, mes të cilëve edhe kryeministri Edi Rama. Inagurohet stadiumi “Elbasan Arena”, Rama i shënon Berishës
(Në foto: Atmosfera në Elbasan sot në mesditë )
(Në foto: Atmosfera në stadium në momentet para fillimit të ndeshjes)
(Në foto: Stadiumi "Elbasan Arena" fotografuar nga Alket Islami)
(Në foto: Trafiku në hyrje të Elbasanit)
Fotolajm-Biletat
Interesimi për bileta për ndeshjen e sotme Shqipëri – Danimarkë është maksimal. Në treg për këtë ndeshje janë hedhur vetëm 10 mijë bileta, ndërsa pjesa tjetër janë rezervuar nga institucionet. Sipas informacioneve nga FSHF kanë qenë 27 mijë kërkesa për bileta për ndeshjen e shumë pritur, por pjesa më e madhe e tyre do ta shohin ndeshjen nga televizori, pasi kapaciteti i stadiumit është mjaft i vogël, 12.500.
Interesimi është aq i madh saqë një tifoz shqiptar nga Elbasani nuk kursen asgjë për dashurinë që ka për Kombëtaren e Shqipërisë.
Ai është i gatshëm të ndërroi makinën e tij për të siguruar një biletë për ndeshjen ndaj Danimarkën.
Në makinën e tij është fiksuar një letër ku thuhet se e ndërron me një biletë stadiumi.
Redaksia Online
(e.c/shqiptarja.com)