Meta paralajmëron Bashën dhe Kryemadhin: Nëse ka dhunë përgjegjësia është e juaja!

TIRANE- Pak orë nga protesta e opozitës shqiptare, Presidenti i Republikës, Ilir Meta ka paralajmëruar liderët e PD-së dhe LSI-së, Lulzim Basha dhe Monika Kryemadhi se nëse në tubim do të shënohen incidente dhe akte dhune si në 11 maj do të mbajnë përgjegjësi, pasi janë ata që i kanë thirrur qytetarët që të marrin pjesë. Kreu i shtetit bën apel që tubimi të jetë paqësor duke i cilësuar si të papranueshme aktet e dhunës në protestat e kaluara.

"Në prag të protestës kombëtare të thirrur sot në mbrëmje nga drejtuesit e Opozitës së Bashkuar, duke shprehur bindjen se tubimet paqësore  e demokratike, janë një e drejtë fondamentale e demokracisë, legjitime e kushtetuese, dua të theksoj se sa e rëndësishme është që ajo të jetë tërësisht paqësore.

Si President i Republikës kam qenë dhe jam i bindur se është më mirë që shqiptarët të protestojnë për të drejtat e tyre dhe të kërkojnë një Shqipëri më të mirë dhe gjithëpërfshirëse, se sa të largohen nga vendi. Në protestat e mëparshme, pavarësisht nga përkrahja qytetare, janë vërejtur disa akte dhune të papranueshme, ndaj dua t’ju kujtoj se drejtësia e kauzës tuaj, nuk duhet të cënohet nga veprime të papërmbajtura të individëve të caktuar.

Është përgjegjësi e udhëheqësve të Opozitës së Bashkuar për mbarëvajtjen e protestave ku ata ftojnë qytetarët të marrin pjesë.  Vetëm në këtë mënyrë, kauza juaj për një demokraci të vërtetë, që garanton një bashkëjetesë të gjerë qytetare, legjitimitet e funksionalitet të institucioneve, do të dëgjohet më mirë brenda dhe jashtë vendit. Protestat e vazhdueshme të opozitës kanë pasur vëmendjen dhe janë transmetuar nga mediat më të njohura botërore, por imazhet tërësisht paqësore të protestës suaj do t’i shërbejnë më mirë të ardhmes europiane të Shqipërisë" deklaron Meta.

Kështu për herë të parë Presidenti i Republikës rreshtohet publikisht në krah të ndërkombëtarëve dhe të gjithë zërave brenda dhe jashtë vendit që dënojnë dhunën gjatë protestave të opozitës. Në orën 19:00 opozita do të protestojë para Kryeministrisë duke kërkuar largimin e Edi Ramës, teksa ka bojkotuar zgjedhjet lokale të 30 qershorit. Meta dje deklaroi se është gati që të shtyjë datën e zgjedhjeve nëse palët kanë vullnet për zgjidhjen e krizës. Kryeministri i ka drejtuar Bashës katër letra publike duke kërkuar dialog, po ashtu edhe Gjermania është angazhuar, por Basha ka vendosur kusht largimin e Ramës.

/G.M./Shqiptarja.com

TAG:
• Ilir Meta
• protesta e 25 majit