SPAK arreston Kreshnik Farrukun, zbardh rolin në grupin që mbushi Italinë me kokainë nga Amerika e Jugut! Ishte lënë në arrest shtëpie

TIRANE-  Kreshnik Farruku, i njohur si kreu i  klanit “Farruku” u arrestua të shtunën (11 nëntorit 2025) në Durrës me urdhër të Prokurorisë së Posaçme pasi SPAK e akuzon si anëtari i një grupi të strukturuar kriminal që trafikonte sasi të mëdha kokaine nga Amerika e Jugut drejt porteve detare italiane kryesisht atij të Livornos. Në 6 muaj organizata kishte arritur të trafikonte kokainë në vlerën 5 mln euro

Në njoftimin e sotëm SPAK zbuloi se nga hetimet e kryera vetë kishte arritur të identifikonte Kreshnik Farrukun, (Kreshnik Budlla) si organizatori i pritjes dhe magazinimin e drogës në Itali dhe më pas shpërndarjen në tregun italian

“Nga veprimtaria hetimore e kryer në Shqipëri, është bërë identifikimi i shtetasit, Kreshnik Budlla anëtar i grupit të strtruktuar kriminal, i paidentifikuar nga autoritetet italiane, i cili merrej me organizimin e pritjes, magazinimin e drogës në Itali dhe më pas shpërndarjen në tregun italian" informoi sot SPAK. 

LEXO EDHE:
RENEA arreston Kreshnik Farrukun me urdhër të SPAK! Prangosja me kërkesë të prokurorisë së Firences! Gjykata e Durrësit e kishte lënë në arrest shtëpie

SPAK e lidh Farrukun dhe me dy episode të trafikut të drogës në Itali, njërin në 2021 dhe tjetri në janar 2024. Hetimet ndaj rrjetit kriminal shqiptar u iniciuan nga Prokuroria e Firences në Itali, në vitin 2021.

Operacioni është vijim i operacionit të ndërmarrë në nëntor 2024 ku në total u arrestuan 23 persona në Itali (Toskanë, Kalabri, Lazio, Puglia, Campania, Lombardi, Veneto, Liguria) dhe 2 persona në Shqipëri. Të arrestuarit në Shqipëri ishin Maksim Ndoci dhe Juljan Kollçaku. 

"Konkretisht, ai është organizatori i furnizimit të lëndës narkotike, e sekuestruar më 27 janar 2021 në Autostradën Guardamiglio (LO), Itali, ku janë arrestuar shtetasit shqiptare;E.K. dhe M.K., të cilëve iu gjet një sasi e lëndës narkotike të llojit kokainë, me një peshë totale bruto prej 10.522 kg, e paketuar në 9 pako plastmasi të fshehura në një hapësirë të një mjeti, Ford Fiesta. Përveç këtij sekuestrimi, ekzistojnë elementë të shumtë të komunikimeve të të arrestuarit K.B, me pjesëtarët e grupit të strukturuar kriminal, (tashmë të arrestuar në Itali), duke provuar rolin e tij brenda grupit të strukturuar kriminal.

Gjithashtu, në datë 12.01.2024, është ekzekutuar dhe vendimi për caktimin e masës së sigurimit të dhënë nga Gjykata e Posaçme e Shkallës së Parë për shtetasit; Juljan Kollçaku dhe Maksim Ndoci, të arrestuar më parë, pas urdhrit të kërkimit i nxjerrë nga autoritetet gjyqësore italiane, por për të po kryheshin hetime nga Prokuroria e Posaçme në kuadër të procedimit penal nr.296 të vitit 2021"  thuhet në njoftim.

4 dite arrest shtepie
Zgjati vetëm 4 dite “arresti në shtëpi” që fitoi nga Gjykata e Durrësit për 51 vjecarin Kreshnik Farruku, i njohur si kreu i klanit "Farruku'. Ai u prangos mbrëmjen e 11 janarit me urdhër të SPAK në bashkëpunim me prokurorinë e Firenzes me qëllim ekstradimin drejt Italisë. Për riarrestimin e Farrukut në Manzë ku qëndronte “arrest shtëpie” ndërhyri reparti special RENEA.

U zbuluan nga SkyECC
Hetimet ndaj rrjetit kriminal shqiptar u iniciuan nga Prokuroria e Firences në Itali, në vitin 2021 kur u krijua ekipi i parë i përbashkët hetimor (JIT) mes autoriteteve italiane dhe shqiptare. Hetimet u mbështetën nga përgjimet e shkëmbimeve të informacionit mes organizatave kriminale, të cilat përdornin mjetin e komunikimit të koduar, SkyECC.

Nga hetimet e kryera në kuadër të planit operacional “BOCA DEH RIO”, dyshohet se këta shtetas, të organizuar si grup, gjatë periudhës 2018-2024, trafikuan sasi të konsiderueshme të lëndës narkotike Kokainë nga Amerika Latine dhe më pas e kanë shitur në qytetet Pisa, Firence, Livorno, Venecia dhe Romë.

Në njoftimin e nëntorit 2024 SPAK informoi se ishin sekuestruar  mbi 2 ton kokainë, 45 kg hashash, 20 kg marijuanë – nga e cila, grupi kriminal do të kishte përfituar rreth 70 milionë euro. Gjithashtu zbuloi dhe skemën si ngarkesat e mëdha të drogës nga Amerika e Jugut përfundonin në portet italiane

“Grupi i strukturuar kriminal ishte aktiv si furnizues me shumicë i drogës në tregjet italiane. Dërgesat e drogës dërgoheshin nga Amerika e Jugut në kontejnerë, përmes porteve italiane (Livorno, Genova dhe Savona) dhe në vende të tjera evropiane. Kontejnerët ruheshin në portet e mbërritjes, ku ekipet e posaçme kujdeseshin për rikuperimin e lëndës narkotike dhe nxjerrjen e dërgesave nga zonat portuale, për t’i vënë më pas në dispozicion të grupeve kriminale. Për të lehtësuar operacionet e identifikimit dhe gjetjes së kokainës, grupi i strukturuar kriminal përdorte pajisje radiolokalizimi, ndërsa lënda fshihej brenda kontejnerëve të ngarkuar me mbulesë frutash ekzotike ose në hapësirat e posaçme të krijuara për këtë qëllim” thuhet në njoftimin e SPAK.

SPAK sqaron se procedimi penal është ende në fazën e hetimeve paraprake.

Rendit zhvillimet sipas orarit:

Të Fundit Të Parat

S.G/Shqiptarja.com

TAG:
• Italia
• trafik droge
• Juljan Kollcaku
• kreshnik budlla
• Kreshnik Farruku
• Maksim Ndoci