Stadiumi,Partizani kërkesë Bashkisë:
Na lejo të luajmë në 'Selman Stërmasi'
 

Partizani i ka dërguar një shkresë zyrtare Bashkisë së Tiranës ku kërkon autorizimin për të përdorur përkohësisht deri në fund të sezonit të stadiumit “Selman Stërmasi”.
 
Çështja e stadiumit është kthyer në mollë sherri mes dy skuadrave të kryeqytetit Tiranës dhe Partizanit dhe skuadra e kuqe do që ndeshjet si pritëse të mos i luaj më në Elbasan por në kryeqytet.
 
Në kërkesën që mban datën 16 janar të këtij viti dhe firmën e Drejtorit të Përgjithshëm Genc Tomorri klubi rendit edhe arsyet se pse Bashkia si pronare e stadiumit nuk mund ta refuzoj këtë kërkesë të Partizanit.
 
Së pari Partizani sqaron se nuk ka asnjë pengesë të arsyeshme për mosluajtjen e ndeshjeve në “Selman Stërmasi” pasi kontrata që Tirana kishte me Korabin është ndërprerë. Së dyti klubi i kuq argumenton se ka rënë ndjeshëm numri I tifozëve që e ndjekin në stadium pasi ndeshjet zhvillohen në Elbasan.
 
Mbi të gjitha në kërkesë theksohet se:”Është një akt tërësisht diskriminues ndaj një pjesë të madhe të qytetarëve të Tiranës duke konsideruar se stadiumi është në pronësi të Bashkisë dhe duhet ti shërbejë kryeqytetit”, mbyllet shkresa e klubit Partizani drejtuar Bashkisë Tiranë.