Protesta e studentëve/ Qeveria jep edhe 3 mln euro për konviktet, investimi në total 56 milionë euro (Detajet)

Studentët vijojnë protestën të ndarë në dy grupe, ndërsa kërkojnë plotësimin e tetë kërkesave, por pa dialog me qeverinë. Njëra nga kërkesat e studentëve është përmirësimi i kushteve në konvikte (lexo këtu). E ndërsa pak ditë më parë Rama publikoi një video me pamjet nga investimet që po bëhen te Inxhinieria e Ndërtimit, sot Këshilli i Ministrave ka miratuar dy vendime për rehabilitimin e konvikteve në Tiranë.

“Miratohet në parim marrëveshja e financimit ndërmjet Republikës së Shqipërisë, përfaqësuar nga Ministria e Financave dhe Ekonomisë (Marrësi) dhe KfW Frankfurt am Main (KfW), për programin e rehabilitimit të konvikteve të Universitetit të Tiranës sipas parimit të efiҫencës së energjisë, faza III, me një grant në shumën 2 927 765.96 (dy milionë e nëntëqind e njëzet e shtatë mijë e shtatëqind e gjashtëdhjetë e pesë pikë nëntëdhjetë e gjashtë) euro, sipas tekstit bashkëlidhur këtij vendimi”thuhet në vendim.

Fondi sotëm prej rreth 3 milionë eurove i shtohet atij prej 18 milionë që janë parashikuar për fazën e parë për investimet te konviktet e Inxhinierisë së Ndërtimit e quajtur ndryshe Qendra Studentore nr.2 si dhe projektin për shndërrimin e Qytetit Studenti në një qendër moderne për akomodimin e studentëve. Gjithashtu kryeministri deklaroi mbrëmë se investimi për konviktet në total është 56 milionë euro, ndërsa vetëm faza e parë kap vlerën e 18 milionë eurove.

Pas vendimit lidhur me marrëveshjen me qeverinë gjermane për rikonstruksionin e konvikteve në Universitetin e Tiranës, ka reaguar LSI. Deputetja Kejdi Mehmetajt akuzoi se kryeministri Edi Rama po tallet me studentet duke u hedhur hi syve. “Të tallesh sot me studentët, tu hedhësh copa letrash përpara edhe asgjë konkrete, do të thotë vetëm të kesh frikë prej tyre, jo vetëm të jesh në ngërç, por edhe të duash të bësh sikur ata nuk ekzistojnë” tha Mehmetaj ndër të tjera.

TAG:
• edi rama
• mbledhje qeverie
• angela merkel
• konviktet
• protesta e studentëve