Protesta/ Një grup studentësh vijojnë para Kryeministrisë, 'sfidojnë' të ftohtin me zjarr, Rama: Kur do flasim?

Kryeministri Edi Rama ka postuar disa foto në rrjetin e tij social Instagram. Në një nga fotot e postuara Rama ka bërë pyetjen drejtuar studenteve: Kur do flasim?

Postimi i Ramës në Instagram 

Ndërsa edhe një foto tjetër është postuar nga kryeministri por është hequr shpejt. Në të Rama kishte vendosur disa filtra Instagrami.

Postimi që u fshi nga kryeministri Rama

Teksa Rama i fton prej kohësh për dialog, një pjesë e studentëve protestues qëndrojnë para kryeministrisë ndërsa të tjerë para godinës së Ministrisë së Arsimit.

Krahas shtrimit të mbulesave në tokë, studentët që po protestojnë përpara Kryeministrisë dhe Ministrisë së Arsimit kanë ndezur edhe zjarr për t'u ngrohur. Ata janë shprehur se ndonëse temperaturat janë të ulëta, do të vijojnë të protestojnë për plotësimin e tetë kërkesave të parashtruara edhe përgjatë orëve të vona. 

Studentët të cilët po protestojnë përpara Kryeministrisë, kanë shtruar mbulesat në tokë. Ata janë shprehur për gazetaren e Report Tv, Esiona Konomi se do të kalojnë natën përpara këtij institucioni.

"Derisa të dëgjohet fjala jonë, do të qëndrojmë përpara Kryeministrisë. Duam thjesht të drejtat tona", u shpreh njëri protestues.

Studentët përpara Kryeministrisë, kanë shtruar mbulesat në tokë

Kryeministri Edi Rama e ka cilësuar ditën e nëntë të protestës së studentëve "si një tjetër ditë të humbur me arsyen e Mosarsyes". Përmes rrjetit social "Twitter", Rama shkruan me ironi se e tërë situata është orkestruar nga kryetarja e Lëvizjes Socialiste për Integrim Monika Kryemadhi, Kryetari i Partisë Demokratike Lulzim Basha dhe nga nxitja që po iu bën studentëve profesor Arlind Qorri. Rama shton më tej se kultura ku shpalosen kërkesa dhe nuk kërkohet të fliten për to, nuk janë produkt i demokracisë së përftuar nga prindërit.

Kryeministri Edi Rama në rrjetin social "Twitter"

Studentëve të cilët po protestojnë përpara Kryeministrisë, iu kanë ardhur sërish në ndihmë qytetarët. Sikurse shihet në video, një grua e veshur me një xhup të kuq iu ka shpërndarë dhe ofruar ushqim falas. 

Pas 25 procedimeve penale për qytetarë, studentë përfshirë pedagogun Edmond Tupe dhe artistin Robert Aliaj, ka ardhur reagimi edhe nga Policia e Shtetit. Në një deklaratë për mediat, Policia sqaron se procedimi është bërë i shkëputur dhe ka patur në fokus të gjithë personat që kanë cënuar protestën.

Njoftimi i plotë:

Në përgjigje të interesit të disa mediave, Policia e Shtetit sqaron se gjatë protestave të zhvilluara gjatë ditëve të fundit në Tiranë dhe në disa qarqe të tjera të vendit, punonjësit dhe strukturat e saj janë angazhuar në një vëllim të shtuar shërbimesh, të cilat kanë pasur si qëllim garantimin e kushteve për ushtrim të lirë dhe të pa cenuar të së drejtës për protestë dhe për ruajtjen rendit publik e të qetësisë së përgjithshme të qytetarëve. Në zbatim të procedurave standarde policore dhe të detyrimeve ligjore, Policia e Shtetit ka filluar procedime në bazë të ligjit për raste të shkëputura personash, të cilët e kanë cenuar qartazi atë, kryesisht në formën e bllokimit të akseve rrugore të vendit, goditjes me sende të forta, apo djegies së materialeve të dëmshme për shëndetin e qytetarëve në mjedise të rëndësishme publike. Policia e Shtetit shpreh edhe një herë gatishmërinë e strukturave të saj për të shërbyer me përkushtim të plotë ndaj të drejtës së çdo qytetari për të protestuar si dhe ndaj mirëmbajtjes së rendit, sigurisë dhe normalitetit të jetës për të gjithë qytetarët e tjerë.

Ditën e nesërme, protesta do të zhvendoset para Parlamentit. Studentët bëjnë me dije se protesta e tyre do të bashkojë nesër të dyja grupet, atë që po proteston para Ministrisë së Arsimit dhe atë që po proteston tek Kryeministria. Studentët thonë se nuk do të tërhiqen deri në realizimin e të 8 kërkesave të tyre. 

“Nesër të gjithë studentët do të protestojnë para parlamentit, ne nuk do të lejojmë që kazani ashtu si preferon ta thotë dikush, të diskutojë llogje pa vlerë në atë parlament, ne jemi përfaqësuesit më dinjitozë, do të protestojë bashkë, vatra do te jetë nesër një, nesër në të njëjtin vend, jemi në një kauzë, jemi një, vetëm studentë, ne që ëndërrojmë Shqipërinë Evropiane"-kanë thënë studentët.

Lëvizja e protestave në mbështetje të studentëve në Tiranë dhe në rrethe, ka nisur sot dhe në qytetin e Beratit. Kanë qënë gjimnazistët e BabëDudë karbunarës” gjimnazit më të madh në qytet, të cilët nisën të dalin sot në rrugë.

Rreth orës 11:00 gjimnazistët u mblodhën në qendër të qytetit, ndërkohë që nuk vonoi dhe mbështetja e qytetarëve.

Gjimnazistët me pankarta nëpër duar u shprehën në solidaritet me studentët që po protestojnë në Tiranë që prej disa ditësh, ndërkohë që janë shprehur se u penguan që të mblidheshin më të shumtë në numër.

Gjimanzistët u shprehen se kishin vendosur që të mblidheshin rreth orës 10:30, kohë në të cilën është pushimi i madh, por sot orët janë zhvilluar të reduktuara me nga 35 minuta dhe nuk është zhvilluar pushimi i madh.

“Nuk na lejuan që të dilnim nga shkolla, sepse orët u bënë të shkurt dhe na mbyllën dyertë”, u shprehën gjimnazistët”. Mbështetje për gjimnazistët dhanë dhe qytetarë të Beratit, të cilët u bashkuan në këtë protestë. 

Nga ana tjetër burime nga shkolla “Babë Dudë Karbunara” bëjnë me dije se orët e mësimit janë zhvilluar sot me orë të reduktuara për shkak të temperaturave mjaft të ulëta të ditës së sotme.

Vazhdon protesta prej 5 orësh para kryeministrisë. Njëra nga studentet e protestës u shpreh para gazetarëve se nuk pranohet dialogu apo negociatat. ‘Duam të shkruajmë historinë. Nuk negociojmë. Nuk kërkojmë luks, kërkojmë karrige, banka, dhe dërrasa se janë copë copë. Kërkojmë të na plotësohen kërkesat. Nuk duam dialog.”-u shpreh njëra nga studentet.

Në ditën e 9-të të protestës, studentët janë ndarë në dy grupe. Një grup po proteston nga mbrëmë përpara Kryeministrisë, ndërsa një grup tjetër përpara Ministrisë së Arsimit, atje edhe ku nisi protesta.

Kryetari i grupit parlamentar të LSI-së, Petrit Vasili ka dalë në një konferencë për mediat nga selia e LSI-së, pas propozimit të Kryeminisitrit Edi Rama për hapjen e një procesi dialogu student-qeveri.

Vasili tha se kryeministri Edi Rama kërkon që t’i mashtrojë studentët.

“Studentët jetojnë në kushte mizore, Kryeministri Rama, premtime boshe. Rama kërkon që të mashtrojë studentët. Të rritet buxheti për arsimin. LSI, amendamente për kërkesat e studentëve. Protesta e studentëve është e drejtë. Dialogu nën presionin e shantazheve dhe presioneve.”-u shpreh Vasili.

Prej rreth një orë asnjë automjet nuk ka udhëtuar nga Elbasani në drejtim të Tiranës. Studentët e Universitetit "Aleksandër Xhuvani" janë mbledhur te rrethrrotullimi i Bradasheshit në dalje të qytetit dhe kanë bllokuar autostradën në drejtim të Tiranës. Kjo bëri që policia të devijonte lëvizjen e automjeteve në drejtim të rrugës së vjetër të Krrabës. Por studentët nuk janë ndaluar dhe brenda pak minutash kanë bllokuar edhe aksin e vjetër Elbasan-Tiranë.

Momenti kur policia devijoi trafikun nga rruga e vjetër e Krrabës

Është mbyllur paqësisht dita e nëntë e protestës së studentëve në qytetin e Korçës. Protesta e studentëve në Korçë u mbyll me marshimin e studentëve para Katedrales së qytetit. Në mbështetje të studentëve ishin edhe gjimnazistët e shkollave të mesme të këtij qyteti.

Report Tv ka mësuar se një grup i ngushtë njerëzish pranë kryeministrit Edi Rama, po punon intensivisht për përgatitjen e dialogut me studentët. Të njëjtat burime flasin për elementë surprizë që do t'u shtohen pikave të studentëve.

Kryeministri është gati që të nisë zbatimi për të 8 pikat me të nisur dialogu. Drafti i uljes së tarifave shkon përtej kërkesës së studentëve dhe pret firmën e Ramës. Po ashtu është punuar për të gjitha pikat e tjera, në pritje të studentëve që duan të dialogojnë.

Burimet konfirmojnë gjithashtu se pa u hapur dialogu, kryeministri nuk ka ndërmend të lëvizë nga pozicioni i tij.

Paralelisht me Tiranën edhe studentët në Korçë po protestojnë. Report TV sjell pamje nga marshimi i tyre në qytet.

Në një reagim tjetër për protestën e studentëve, Rama ka kërkuar sërish dialog me ta. Ai iu referua deklarimeve të një studenteje, e cila tha se duan që t’u plotësohen 8 pikat pa dialog, por nuk duan të bisedojnë. Dhe Rama pyet se në cilën familje ecën kjo logjikë?

Statusi i Ramës

Një vajzë sapo tha: s'duam të lutemi (në fakt lutem unë:-) po duam të na plotësohen 8 pikat pa dialog! D.m.th. s'duam të bisedojmë për kërkesat tona, po duam të bërtasim deri në plotësimin e tyre! Në cilën familje ecën kjo logjikë?Në familjen tonë të madhe jo njëherë, prandaj DIALOG.

Paralelisht me Tiranën protesta e studentëve po vijon edhe në Vlorë. Studentët e universitetit Ismail Qemali të Vlorës kanë protestuar sërisht ditën e sotme para ambienteve të godinës së rektoriatit të këtij universiteti. Me megafonë në duar, për mbi 1 orë, këta studentë kanë kërkuar  plotësimin e 8 kërkesave të tyre. Ata thonë se nuk do të tërhiqen deri në plotësimin e tyre. Studentët kanë marshuar drejt sheshit të Flamuarit , ku në rrugën Transballkanike kanë ndaluar duke bllokuar një nga akset e kësaj rruge.

Dhjetëra studentë janë mbledhur te rrethrrotullimi i Bradasheshit. Ata kanë marshuar në këmbë nga Universiteti "Aleksandër Xhuvani" dhe vijuan protestën në dalje të qytetit ku bllokuan autostradën Elbasan-Tiranë. Ata janë ulur këmbëkryq në rrugë dhe nuk lejojnë kalimin e asnjë automjeti. Protesta pritet të zgjasë rreth një orë.

Studentët e Elbasanit bllokojnë autostradën drejt Elbasanit

Studentët protestues përpara Kryeministrisë kanë lexuar 'live' një prej postimeve të kryeministrit Edi Rama në rrjetet sociale (Lexo këtu). Përgjigjja e studentëve për kryeministrin ka qenë: "Përqafimin ta kthejmë mbas. What the F*ck! Ku ishe 5 vjet zoti kryeministër? Plotëso kushtet tona". 

Report Tv sjell fotot nga lart të protestës së studentëve në Tiranë në ditën e 9-të (Lexo këtu). Protesta vijon të jetë e ndarë në dy pjesë te Ministria e Arsimit dhe Kryeministria. Kjo është pjesëmarrja në protestë deri në këto momente kur ora shënon 11:25 minuta.

Studentët po protestojnë të ndarë edhe sot. Pjesa dërrmuese e tyre ndodhen përpara Ministrisë së Arsimit aty ku protestojnë për të 9-ën ditë me radhë, ndërsa një pjesë tjetër ndodhen përpara Kryeministrisë. Mes studentëve nuk mungojnë as akuzat për përdorim politik. Ishin studentët e Politeknikut ata të cilët marshuan në këmbë nga sheshi "Nënë Tereza" dhe vijuan drejt Ministrisë së Arsimit duke shmangur protestuesit te Kryeministria duke thirrur "Jo politikë". 

Protesta u nda një ditë më parë pas skadimit të ultimatumit të vendosur për kryeministrin Edi Rama, kur një grup studentësh marshuan drejt rrethrrotullimit të "Zogu të Zi" ku bllokuan trafikun për më shumë se një orë, ndërsa pjesa tjetër qëndroi përpara Ministrisë së Arsimit. Përpara këtyre dy institucioneve kaluan edhe natën në të ftohtë një grup i vogël studentësh. 

Studentët e Universitetit Fan S. Noli në qytetin e Korçës kanë denoncuar drejtoreshën e gjimnazit Raqi Qirinxhi, Keti Qirinxhin se po kërcënon nxënësit e gjimnazit, me qëllim që të mos marrin pjesë në protestë.

Studentët thonë se drejtoresha ka bërë statuse në rrjetet sociale kundër protestës dhe se sipas tyre, drejtoresha është koordinatore e Partisë Socialiste në këtë qytet.

“Larg politikës, drejtoresha bën presione ndaj nxënësve. Ajo është koordinatore e PS dhe këto rrënjë i ka shtrirë te nxënësit.”-janë shprehur nxënësit.

Protesta e studentëve ka nisur edhe në Gjirokastër, paralelisht me protestën që po zhvillohet në Tiranë dhe në rrethet e tjera të vendit. Me pankarta në duar studentët e Universitetit Eqerem Cabej, kërkojnë plotësimin e kërkesave të tyre.

TIRANE - Studentët e Universitetit Politeknik të Tiranës kanë marshuar në këmbë nga sheshi "Nënë Tereza" në drejtim të Ministrisë së Arsimit me thirrje dhe pankarta për realizimin e 8 kushteve. Moment pikant ka qenë ai përpara Kryeministrisë, në Bulevardin "Dëshmorët e Kombit" kur studentët e UPT nuk i janë bashkuar studentëve të tjerë, një pjesë e vogël e të cilëve kaluan edhe natën në të ftohtë aty.

Momenti kur studentët e UBT kalojnë tanget me protestuesit te Kryeministria

Me thirrjet "Jo politikë" dhe "Protesta është e studentëve", studentët e UPT kanë shmangur studentët e tjerë përpara ndërtesës qeveritare dhe kanë vijuar marshimin në këmbë drejt Ministrisë së Arsimit ku edhe është grumbulluar pjesa më e madhe e studentëve protestues. Ata kanë kërkuar që protesta e tyre të mos politizohet nga partitë politike, por të ketë në fokus vetëm problematikën e universiteteve dhe kërkesat e adresuara prej tyre. 

Pas nisjes së ditës së 9-të të protestës së studentëve ka reaguar sërish kryeministri Edi Rama. Rama iu bën sërish thirrje studentëve për hapjen e një procesi dialogu. Kryeministri shton se 8 pikat janë pikënisja e një faze transformimi për Universitetet. Kryeministri thotë se nuk ka asnjë kusht dhe iu dërgon atyre përqafime dhe kurajo.

Reagimi i Ramës:

Të dashur studentë protestues, gjithçka na duhet tani është të ulemi dhe të flasim. 8 PIKAT janë për mua vetëm pikënisja e një faze të re transformimi të botës sonë universitare. Dhe këtë transformim mund, duhet e do ta bëjmë VETEM SE BASHKU, përmes një Pakti për Universitetin mes studentëve dhe qeverisë. Adresimin e 8 PIKAVE duhet të nisim pa humbur kohë. Kemi punë për të bërë dhe nëse doni që uljen e tarifave ta mbyllim para pushimeve tuaja të Vitit të Ri, s'ka realisht minuta për të humbur me llogjet e kazanëve dhe rrugët shkencore të Doktorreshë Monës e të Profesor Lulit. Unë jam gati dhe s'kam asnjë kusht, prandaj bëhuni mbarë e më çoni fjalë, kur e ku doni të takohemi. Përqafime dhe kurajo, sepse do ju duhet shumë kur ta kuptoni që kjo që keni nisur është ku e ku më e madhe, sesa ato 8 PIKA:-)

Studentët e Universitetit të Tiranës dhe të disa prej fakulteteve kryesore kanë nisur protestën para Kryeministrisë në Bulevardin Dëshmorët e Kombit. Protesta e studentëve hyn sot në ditën e 9-të, ndërkohë që me thirrjet: "8 pika. Dy sheshe. Një kauzë", studentët kërkojnë plotësimin e kërkesave të tyre. Ndërkohë që edhe gjimnazistë nga gjimnazet kryesore në Tiranë kanë bojkotuar sërish mësimin.

Kryetari i Partisë Demokratike, Lulzim Basha ka reaguar pas procedimit penal për 25 protestuesit që bllokuan dje rrugën tek Zogu i Zi. Në një reagim në rrjetet sociale, Basha thotë se për tenderin e Unazës së Re nuk u procedua askush, ndërsa studentët që bllokuan rrugën tek Zogu i Zi procedohen penalisht.

Kapen duke vjedhur dhe pastruar 30 milionë euro, por as hajduti psiqik dhe asnjë nga vartësit e tij nuk është duke u hetuar penalisht. Ngritën zërin kundër qeverisë, të drejtë të cilën ja u ka dhënë Zoti dhe Kushtetuta dhe ka filluar procedimi penal për 25 qytetarë të lirë.

Lulzim Basha, kryetar i PD

Ka nisur edhe në Korçë protesta e studentëve të cilët janë solidarizuar prej disa ditësh me protestën 9 ditore të studentëve të Tiranës. Studentëve të Universitetit "Fan Noli" i janë bashkuar edhe gjimnazistët. Ata janë nisur në këmbë nga ambientet e Universitetit dhe kanë marshuar në qytet, ndërsa në duar mbanin pankarta me mbishkrime për realizimin e tetë kërkesave. 

Nis protesta e studentëve edhe në Sarandë. Studentët e Filialit të Universitetit të Tiranës, dega Ekonomik dhe ata të degës së Infermierisë, pjesë e Universitetit të Mjekësisë janë ngritur në këmbë për realizimin e tetë kërkesave. Me thirrjet "S'duam dialog, plotësoni kërkesat" studentët në të gjithë vendin kanë bojkotuar mësimin dhe protestojnë prej 9 ditësh.

Ka nisur dita e 9-të e protestës së studentëve në Shkodër. Studentë të Universitetit Luigj Gurakuqi janë mbledhur në këtë qytet në mbështetje të protestës së studentëve në Tiranë. Ditën e djeshme studentët e Shkodrës protestuan, madje disa autobusë u nisën në Tiranë.

Dy deputetet e Lëvizjes Socialiste për Integrim, Floida Kërpaçi dhe Kejdi Mehmetaj, kanë shkuar mëngjesin e sotëm në Kryesinë e Kuvendit, ku kanë dorëzuar dy amendamentet e LSI-së për plotësimin e kërkesave të studentëve.

Mehmetaj u shpreh se votat e LSI janë për studentët. “Votat tona janë për studentët. Rama tentoi të bëjë shoë, donim të ishim pjesë e protestës.”-u shpreh Mehmetaj.

Më herët ishte kryetarja e LSI-së, Monika Kryemadhi që kërkoi votimin me urgjencë të dy amendamenteve, njëri që 1% e Prodhimit të Brendshëm Bruto të shkojë për Arsimin dhe tjetri, për krijimin e një Fondi Emergjence që do të shërbente për investimet në infrastrukturën arsimore.

Edhe te Ministria e Arsimit një grup studentësh kanë kaluar natën jashtë sikurse te Kryeministria (Lexo këtu). Ata kanë qëndruar përballë Ministrisë edhe pse temperaturat kanë zbritur nën zero. Siç duket edhe nga këto foto të siguruara nga "Shqiptarja.com", studentët kanë ndezur edhe një zjarr në anë të rrugës.

Kryetarja e LSI-së, Monika Kryemadhi, ka dalë në një konferencë urgjente nga selia e LSI-së, për situatën e studentëve në vend. Kryemadhi tha se gjendja është kritike. Kryemadhi propozoi dhe dy amendamente të cilat sipas saj duhen votuar nesër me urgjencë në parlament. (Lexo këtu fjalën e Kryemadhit)

Shqiptarët të rrënuar nga mjerimi, të përkulur nga situata. Gjendja është kritike, mijëra student po përballen me mjerimin dhe arrogancën e qeverisë. Zgjidhja e problemeve është emergjenca kryesore. Mesazhi është një: plotësimi i 8 kërkesave të tyre. Kërkesat e tyre janë minimale.

Monika Kryemadhi, kryetare e LSI-së

Nata e parë e protestës së studentëve para Kryeministrisë ka kaluar pa probleme. Mes temperaturave të ulëta që kanë arritur në minus 2 gradë C studentët kanë qëndruar para Kryeministrisë të mbuluar me batanije. 

Turma që qëndroi dje para Kryeministrisë është shpërndarë dhe shumë pak të rinj kanë rezistuar që të qëndrojnë jashtë deri në mëngjes. Të rinjtë janë mbuluar me batanije,e kapucë, ndërsa qytetarë të ndryshëm iu kanë dhënë atyre ushqim.