Pas sulmit të policisë në fshatin Malinë të Shkupit nga 500 forcat policore vjen reagimi i parë zyrtar nga autoritetet maqedonase. Ministrja e Brendshme maqedonase Gordana Jankullovska deklaroi gjatë një konference për shtyp se në fshatin Brezë të Malësisë të Karadakut të shkupit është gjetur armatimi i marrë në pikën kufitare të Gushnicës.
 
Sipas ministres të punëve të Brendshme maqedonase në shtëpinë e 55 vjeçarit Sulejmani Osmani, banor i fshatit Brezë janë gjetur dy pushkë automatike, dy snajperë, 10 pistoleta dhe municion, radiomarrëse dhe uniforma si dhe maska me emblemë të UÇK-së.
 
Ministrja ka pohuar se pas analizës që është bërë armatimit të gjetur dhe numrave serial është konstatuar se bëhet fjalë për një pjesë të armatimit që është marrë në Gushincë.
 
Jankullovska tha se edhe ish komandanti i UÇK-së Mirsad Ndrecaj, i njohur në vitin 2001 si komandant NATO, është po ashtu një nga të dyshuarit kryesorë të sulmit. Ndërkohë brenda në fshatin Malinë situata paraqitet e qetë, por fshati vazhdon ende të mbahet i rrethuar nga forcat maqedonase të policisë.
 
Ndërkohë policia nuk lejon OSBE-në dhe gazetarët të hyjnë brenda. për situatën pak më herët ka reaguar Kryetari i Bashkësisë Lokale të fshatit Malinë, Veli Saliu, i cili është shprehur se ka pyetur vazhdimisht banoret për gjendjen e tyre, pas panikut qe përjetuan. kurse kryetari I komunës të Gjilanit Lutfi Haziri, në një reagim të tij e cilësoi sulmin provokim ndaj shqiptarëve. Sipas Hazirit sulmi ishte i panevojshëm dhe i dëmshëm për të dyja palët.
 
Redaksia Online
(a.h/shqiptarja.com)