Sulmi në veri, eksperti i Sigurisë nga Prishtina tregon si u identifikua Milan Radoiçiç në Banjskë: Armët e sekuestruara janë të ushtrisë serbe

Të gjitha provat tregojnë se sulmi ndaj policisë së Kosovës më 24 shtator 2023 në fshatin Banjskë të Zveçanit është orkestruar dhe mbështetur nga Beogradi, ndërsa Milan Radoiçiç ishte dora e hekurt e Vuçiç në këtë sulm. Kështu analizon eksperti i sigurisë në Kosovë Taulant Elshani në një intervistë për Report Tv. 

 “Fakti që njëri nga të vrarët në sulm ka qenë truproja e shefit të BIA-s serbe, Agjencisë së Inteligjencës në Serbi,  Aleksandar Vulin është tregues se sulmi terrorist është i mirëmenduar e mbështetur nga Beogradi zyrtar dhe ambiciet për hegjemoni rajonale e destabilizim të Kosovës nga presidenti Aleksandër Vuçiç. Organizator është terroristi dhe krimineli famëkeq Milan Radoiçiç i cili për një kohë të gjatë ka qenë dora e hekurt e Aleksandër të Vuçiç në veri të vendit. Kreu punët më të pista duke i detyruar të kryejnë punë të cilat do të krijonin destabilizim” thotë eksperti i sigurisë Taulant Elshani në një lidhje skype nga Prishtina për emisionin “Sot Live në Shqipëri” në Report Tv

Sa i takon armatimit të sekuestruar grupit terrorist serb, eksperti i sigurisë tregon se janë armë të ushtrisë serbe.

“Janë armë luftarake të reja që i posedon ushtria serbe në mënyrë absolute.  Për publikun në Shqipëri është shumë e rëndësishme të theksohet fakti që në Serbi çdo pore e jetës publike kontrollohet nga Aleksandër Vuçiç. Jo vetëm që i di por i kontrollon dhe ky grup është element në duar të Vuçiç për të destabilizuar jo vetëm Kosovën por dhe rajonin. Armatimi i sekuestruar është armatim ushtarak i ushtrisë serbe”

Eksperti tregon dhe si policia e Kosovës arriti të identifikonte terroristin Milan Radoiçiç

“Janë përdorur dronë me rezolucion të lartë. Profesionistët kanë arritur të kapin në pamje të gjitha lëvizjet e këtij grupi, madje dhe duke i hipur malit për tu larguar”

Eksperti thotë se ndërkombëtarët nuk duhet më të përkëdhelin më Vuçiç.

“Mos përkëdhelni më Vuçiç. Ai është kryesore për destabilizimin e vendit. Nuk ka më dyshime dhe janë prova se shteti serb është 100% i përfshirë në këtë sulm“ thotë eksperti i sigurisë Taulant Elshani në lidhjen skype nga Prishtina me gazetarin Nertil Agalliu.

S.G/KT/Shqiptarja.com

TAG:
• kosova
• vritet polici ne kosove