Tre kanë qenë temat e diskutuara nga takimi me dyer të mbyllura për afro 2 orë brenda vilës 31 në Tiranë mes kryeministrit kosovar Albin Kurti dhe kreut të qeverisë Rama. Prezenca e kryeministrit Albin Kurtit në Tiranë ditën e djeshme mori mjaft vëmendje, kjo për arsyen se kryeministri i Kosovës, la në mes një konferencë për mediat për një takim që e cilësoi si urgjent. I pyetur nga mediat kosovare, Kurti u është përgjigjur se ka qenë një takim i mirë, konstruktiv, pozitiv por mbi të gjitha, i nevojshëm.

“Takimi i djeshëm ka qenë një drekë pune me kryeministrin Rama dhe ka qenë një takim shumë i mirë konstruktiv, pozitiv dhe i nevojshëm për shkak të temave që kemi diskutuar”, tha Kurti në një konferencë për media.

Kreu i qeverisë se Kosovës tha se tema kanë qenë sulmet kibernetike, kriza me energjisë dhe takimi i Berlinit.  Sulmi kibernetik në Kosovë u raportua se ndodhi më 6 shtator ndaj disa faqeve të institucioneve pa specifikuar se në cilat, dhe sipas qeverisë kosovare, sulmi është realizuar nga jashtë vendit.

“E para është siguria kibernetike dhe isha shumë i interesuar të marrë vesh sa më shumë për përvojën e tyre të fundit që kanë qenë të dëmshme dhe kriminale, ju keni parë që sot kemi themeluar agjencinë kibernetike”. “Tema e dytë ka qenë sfida e energjisë në ditët dhe javët në vijim, ju e dini se KEK-u dhe KESH-i bashkëpunojnë ngushtë. Ne gjatë verës ju kemi dhënë atyre energji dhe presim që ta kthejnë gjatë dimrit. Konkretisht e njoftova Ramën që ne jemi të parët në Ballkan që kemi marrë vendim për shpërblim të atyre që kursejnë”. “Tema e tretë ka qenë Takimi i Berlinit”, ka deklaruar shkurtimisht kryeministri Kurti.

Kujtojmë se në takimin e djeshëm nga kryeministri Rama që nuk shoqërohej nga asnjë ministër, ndërsa Kurti shoqërohej nga ministri i Ekonomisë. Në takim mësohet se është diskutuar për Portin e Durrësit, si edhe hekurudhën Durrës-Prishtinë.Shqipëria dhe Kosova mbajtën mbledhjen e 8-të e përbashkët me 20 qershor, ndërsa u firmosën 19 marrëveshje, mes tyre edhe ajo për financimin e hekurudhës Durrës-Prishtinë për lidhjen e Portit Romano në Durrës dhe Portit të Thatë në Prishtinë.

Ky takim i Ramës dhe Kurtit, vjen edhe pas tensioneve mes Kosovës dhe Serbisë. Sa i përket nismës ‘Open Balkan’, Shqipëria dhe Kosova vijojnë të kenë qëndrime të kundërta. Kreu i qeverisë Edi Rama vazhdimisht ka ftuar Kosovën të bëhet pjesë. Në përplasjet e fundit në veri të Kosovës për çështjen e dokumenteve të identifikimit dhe targat me Serbinë, Rama tha se kjo nuk tregoi se Ballkani i Hapur është i panevojshëm apo i gabuar, por përkundrazi se është një domosdoshmëri.