Receta

Tavë qengji me kos nga zonja Albana

Në këtë hapësirë të faqes tonë do të gjeni mënyrën e përgatitjes së recetave të gatimit të ideuara nga Zonja Albana. Këto receta Zonja Albana i gatuan çdo ditë në emisionin Rreze Dielli nga ora 09:00 – 10:00.

Redaksia 19 Shtator, 11:23 | Përditesimi: 19 Shtator, 11:25

Tavë qengji me kos

Përbërësit:

1 kg mish qengji
1.5 kg kos të trashë
5 vezë të freskëta
2 lugë miell
3 lugë gjalpë të tretur
1 kokërr qepë
Kripë, piper i zi

Përgatitja:

LEXO EDHE:
Sallatë ruse nga zonja Albana

Mishin e kriposim dhe e vendosim në tenxhere me 2 gota ujë. Në tenxhere kemi futur një kokërr qepë të paprerë, vetëm të qëruar nga lëvozhga. I lëmë të ziejnë për pak kohë, më pas largojmë qepën me ndihmën e një luge dhe nuk e përdorim më. Pastaj mishin e vendosim në një tepsi, e lyejmë me gjalpë dhe e fusim në furrë për 15-20 minuta. Kontrollohet se mos thahet a mos ka nevojë për pak lëng nga lëngu i vet. Para se t'a heqim kur sapo ka filluar të marrë atë faqen e kuqërremtë, shtojmë pak lëng të mbetur në tenxhere, e lëmë edhe disa çaste dhe e heqim nga furra. E lëmë të ftohet. Ndërkohë hedhim në një tenxhere tjetër pjesën e mbetur të gjalpit dhe 2 lugë miell. E përziejmë miellin me gjalpin në zjarr të ngadaltë vazhdimisht që të mos bëhen kokrra. Kur mielli të ketë marrë ngjyrë të artë i shtojmë lëngun e mishit që tashmë është ftohur dhe i përziejmë vazhdimisht derisa të krijohet një masë jo shumë e trashë. E heqim nga zjarri. Në një tas përziejmë kosin me kripën. Rrihen vezët në një enë tjetër, më pas hidhen tek kosi. Pasi të ftohet masa e miellit të skuqur me atë pak lëng mishi në tenxhere i shtojmë kosin, vezët dhe kripën. Përzihen mirë të gjithë përbërësit dhe i vendosim tek mishi i pjekur në tavë, e spërkasim sipas dëshirës me pak piper të zi të bluar dhe e vendosim përsëri në furrë në 180° derisa sipër të krijohet një cipë e kuqërremtë.