Të shtëna me armë në një banesë në Itali, vdes 27-vjeçari shqiptar (EMRI)

ITALI- Një i ri shqiptar humbi tragjikisht jetën mëngjesin e kësaj të hënë në Catania të Italisë. Viktima është Kastriot Ismailaj, 27 vjeç, i cili mbeti i plagosur pak ditë më parë nga të shtënat me armë zjarri.

Siç raportojnë mediat italiane i riu shqiptar ndërroi jetë në orën 9.45 të mëngjesit të sotëm në spitalin Garibaldi Centro, pasi u dërgua i plagosur rëndë nga disa të shtëna që ndodhën në Nesima, brenda një banese sociale në numrin 10.

Gjendja e tij ishte e rëndë dhe mjekët nuk ishin në gjendje të kryenin ndërhyrje kirurgjikale për të nxjerrë plumbin i cili i kishte rënë në kokë. Bashkë me viktimën, i cili ishte pa dokumente në Itali, i plagosur mbeti edhe një 43-vjeçar, i identifikuar si Carmelo Leonardi. Ky i fundit, përveç plumbit, ra edhe nga kati i dytë i godinës ku ndodhi ngjarja.

Ndërkohë në prokurori mëngjesin e sotëm u paraqit një person i tretë, që dyshohet se është i përfshirë në këtë ngjarje. Giovanni Pasqualino Di Benedetto, 27 vjeç, mësohet se është me precedentë të mëparshëm penalë dhe është arrestuar me akuzën e tentativës për vrasje.

Mjekësia ligjore po ekzaminon armën e gjetur brenda mureve të banesës, ndërsa brenda saj janë gjetur tre gëzhoja.

M.Q./Shqiptarja.com

TAG:
• itali
• vrasje
• kastriot ismailaj