POP 5

Lajmet më të lexuara të 5 minutave të fundit

Teatri i Operas sjell ‘Një ballo me maska’ me skenografinë 109-vjeçare të teatrit Regio Di Parma! Golemi, Di Vietri e Likaj si protagonistë të veprës së Verdit

Nga 1 qershori, për 4 netë radhazi teatri “Regio Di Parma” sjell “Një ballo me maska” të Verdit me skenografinë 109-vjeçare të zbuluar rishtazi. Në Itali shfaqja u dha me protagonist Saimir Pirgun, ndërsa në Teatrin e “Operas” do të jetë tenori italian Dario Di Vietri në rolin e kontit Rikardo.

Qershori në Opera nis me “Një ballo me maska”, një produksion i Teatrit Regio di Parma, që vjen në Tiranë për 4 net radhazi në sajë të bashkëpunimit të nënshkruar mes 2 institucioneve. Në sheshet kryesore të kryeqytetit do të mbahen minishfaqje në kuadër të programit shqiptar të “Verdi off”.

“Opera prej shekujsh bën të njëjtën gjë, bashkon njerëzit anë e mbanë botës, për të trashëguar mesazhet më të forta, mesazhe të cilat kanë krijuar historinë në fakt të njerëzimit”, thotë drejtorja e TKOB, Zana Çela.

“Është një ogur i mirë që rihapim kantieret e kulturës me aktivitete të tilla të mëdha”, thotë ministrja e Kulturës, Elva Margariti.

E bën unik këtë vënie të operas së Verdit me katër akte, trashëgimia skenografike italiane, që  daton 109 vite më parë dhe është zbuluar rastësisht në magazinat e Teatrit Regio di Parma, pa pasur askush dijeni për ekzistencën dhe vlerat e tij. Pas restaurimit që mori një vit kohë, është shfaqur në Itali ku protagonisti konti, interpretohej nga tenori shqiptar Saimir Pirgu.

 “Ishte një zbulim në magazinën e Teatrit. Gjithë kjo letër e mbledhur për të cilën nuk kishin dijeni se çfarë ishte. E hapën dhe kuptuan se bëhej fjalë për një spektakël, për spektaklin “Një ballo me maska”. Dhe është tërësisht e vizatuar në letër, diçka unike në të gjithë Italinë!”, thotë skenografia Leila Fteita.

Në natën e parë, sopranoja Eva Golemi do të interpretojë rolin e Amelias, ndërsa Likaj do të jetë në rolin e Renatos. Protagonisti, konti Riccardo i takon kastit italian dhe është Dario Di Vietri.

“Janë të gjithë artistët të mrekullueshëm Renato, Amelia, dhe pastaj të mendosh që do interpretojmë me një skenografi në letër që për ne artistët e sotëm është e paimagjinueshme, është diçka shumë e bukur të shikosh punën e vërtetë që bënin artizanët dikur! “, thotë protagonisti i shfaqjes tenori Dario Di Vietri.

“Unë dhe të gjithë kolegët e mi, pavarësisht periudhës së shkurtër që kemi pasur në dispozicion, kemi bërë më të mirën e mundshme. Ky është një produksion fantastik, klasik siç unë e kam dashur gjithmonë, dhe vërtetë publiku do të kënaqet do të shikojë atë kohën e atëhershme përmes skenografisë”, thotë sopranoja e parë e TKOB, Eva Golemi.

Bashkëpunimi me Teatro Regio Di Parma, do të vijojë edhe në dy vitet që pasojnë me  operat “Traviata” e “Rigoleto”, ndërsa nga 31 maji në  7 qershor publiku do të ketë mundësi të shikojë mbi 50 aktivitete nga Java Italiane.

SI.E./Sh.Sh/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:
    28 Nëntor, 09:20

    A e keni të qartë pse opozita organizon mosbindje civile?

Lajme të tjera



×

Lajmi i fundit

Zjarri në magazinën në Kurbin, rrezikohen banesa! Policia bllokon qarkullimin në aksin Milot-Laç

Zjarri në magazinën në Kurbin, rrezikohen banesa! Policia bllokon qarkullimin në aksin Milot-Laç

29 Nëntor, 22:51