Tetë shoqata fantazmë votojnë
për Presidentin e FSHF-së

Pa filluar mirë gara për zgjedhjen e Presidentit të Fedetarës Shqiptare të Futbollit, ku deri më tani kandidat i vetëm është kreu aktual Armand Duka, bien hije dyshimi për një garë jo të drejtë e të ndershme.

Nga 66 anëtarë të Asamblesë së FSHF-së që janë me të drejtë vote, 8 janë shoqata rajonale të futbollit amator që nuk figurojnë të regjistruara në gjykatë. Pra janë shoqata fantazmë, të cilat njihen vetëm nga FSHF-ja por jo nga organet e shtetit shqiptar. Lajmi bëhet i ditur nga portal sportiv “VipSport.al”. 

“Iu drejtuam Gjykatës së Tiranës, nëpërmjet një avokati, duke qenë se sipas legjislacionit shqiptar, shoqatat duhet të regjistrohen patjetër në Gjykatë. Përgjigja e marrë zyrtarisht nga Gjykata ishte se: Këto SHOQATA NUK EKZISTOJNË. Pra ato nuk janë të regjistruara pranë gjykatës, ashtu siç e kërkon ligji”, shkruan “VipSport.al”. Po kështu është e pamundur që të gjendet një seli apo strukturë e këtyre shoqatave. Askush nuk di të thotë se kush i emëron personat që i drejton ato dhe se mbi çfarë kriteresh do të zgjidhet delegate që do të përfaqësojë këto shoqata në Asambledhën e Zakonshme Zgjedhore.

Nga lista e personave që kanë votuar në vitin 2016 gjatë Asamblesë së Zakonshme vihen re disa emra që ndër këto vite kanë punuar, madje disa prej tyre ende janë të angazhuar në strukturat e FSHF-së. Disa prej tyre, të kontaktuar nga burimi i sipërpëmendur shfaqin padije për çështjen e mosregjistrimit në Gjykatë të shoqatës që përfaqësojnë, apo madje, e shohin regjistrimin si çështje të Federatës. Siç mund të kuptohet, të gjitha këto probleme me statusin e paverifikueshëm juridik të shoqatave, ashtu siç i dëshmon vërtetimi i Gjykatës, lidhen me procesin e katër viteve më parë, ku Armand Duka dhe Komiteti i tanishëm janë zgjedhur.

Zgjedhjet
Komiteti Ekzekutiv i Federatës Shqiptare të Futbollit vendosi më datë 6 janar të thërrasë Asamblenë e Përgjithshme të Zakonshme Zgjedhore, e cila do të mblidhet më 7 shkurt në Durrës. Interesimi më i madh për këtë Asamble është zgjedhja e Presidentit të FSHF-së dhe 11 anëtarëve të Komitetit Ekzekutiv.

Sipas Statusit të FSHF-së Asambleja e Përgjithshme është organi më i lartë legjislativ i Federatës Shqiptare të Futbolli dhe përbëhet nga 66 anëtarë me të drejtë vote. Në faqen zyrtare të FSHF renditen nominalisht se kush janë këta anëtarë, prej të cilëve 54 janë klube sportive të gjithë kategorive të futbollit dhe 12 janë shoqata, prej të cilave 8 janë shoqata rajonale:

Shoqata Rajonale Tiranë, Shoqata Rajonale Shkodër, Shoqata Rajonale Lezhë, Shoqata Rajonale Durrës, Shoqata Rajonale Elbasan, Shoqata Rajonale Fier, Shoqata Rajonale Korçë, Shoqata Rajonale Gjirokastër. 3 janë shoqata që kanë lidhje direkte me aktivitetin si: Shoqata e Arbitrave, Shoqata e Trajnerëve dhe Shoqata e mjekeve sportive, ndërsa 1 është Shoqata e Futsallit.

“Mbreti Duka”
Aktualisht Armand Duka është kandidati i vetëm për postin e kreut të FSHF-së. Presidenti aktual sapo mbyll mandatin e tij të katërt në krye të institucionit drejtues të futbollit shqiptar. Duka ka 16 vjet si president i FSHF-së dhe duket se kërkon ta çojë në 20 vite periudhën e “mbretërimit” të tij në krye të futbollit kuqezi.

Është përfolur se deputeti Bashkim Fino do të kandidojë për të sfiduar Dukën, por deri më tani ish-kryeministri as e ka pohuar e as e ka mohuar garimin e tij. Fino njihet si një mik i ngushtë i presidentit të Partizanit, Gaz Demi dhe për më tepër nëse futet në garë do të ketë mbështetjen e partisë socialiste që është në pushtet.

Si zgjidhet Presidenti
Për zgjedhjen e presidentit të FSHF-së kandidatët duhet të marrin 2/3 e votave. Nëse asnjë nuk e arrin këtë numër, dy kandidatët me më shume vota, zhvillojnë raund tjetër. Fiton ai që merr më shume vota. Nëse edhe në këtë rast nuk fiton askush, 24 orë më vonë mbahet një tjetër asamble, me votim tjetër. Ndërsa për anëtarët e Komitetit Ekzekutiv, fitojnë ata që kanë 50 për qind plus 1 votë në raundin e parë. 

Nëse në raundin e parë nuk fitohet, zhvillohet i dyti dhe fitohet me shumicë të thjeshtë votash. Nëse sërish votat janë barabar, bëhet një raund i tretë dhe, nëse as ky nuk mjafton, anëtarët zgjidhen në bazë të shortit. Neni 13, Pika 2: Çdo kandidat propozohet nga të paktën një anëtar i FSHF-së, jo më vonë se 20 ditë para datës së asamblesë.





 

Anëtarët e Asamblesë me të drejtë vote
1. Ada
2. Beselidhja
3. Bilisht Sport
4. Bylis
5. FC Besa
6. FC Gramozi
7. FC Lushnja
8. FK Apollonia
9. FK Dinamo
10. FK Elbasani
11. FK Kamza
12. FK Kelcyra
13. FK Kukesi
14. FK Memaliaj
15. FK Skrapari 2006
16. FK Sukthi
17. FK Terbuni
18. FK Tomori 1923
19. Flamurtari FC
20. Iliria
21. KF Adriatiku Mamurras
22. KF Burreli
23. KF Butrinti
24. KF Delvina
25. KF Domosdova
26. KF Egnatia
27. KF Erzeni
28. KF Gramshi
29. KF Laci
30. KF Maliqi
31. Fieri
32. KF Naftetari
33. KF Pogradeci
34. KF Pojani
35. KF Policani
36. KF Shkumbini
37. KF Skenderbeu
38. KF Tepelena
39. KF Teuta
40. KF Tirana
41. KF Turbina
42. KF Vllaznia
43. KS Kastrioti
44. KS Korabi
45. KS Luftetari
46. KS Sopoti
47. KS Vlora
48. KSSH Veleciku
49. Luz i Vogel 2008
50. Olimpik FC
51. Partizani
52. Permeti
53. SHS Albpetrol Patos
54. SK Himara
55. Shoqata e Trajnereve
56. Shoqata e mjekeve sportive
57. Shoqata e Arbitrave te Futbollit
58. Shoqata e Futsallit
59. Shoqata Rajonale Tirane
60. Shoqata Rajonale Durres
61. Shoqata Rajonale Shkoder
62. Shoqata Rajonale Elbasan
63. Shoqata Rajonale Fier
64. Shoqata Rajonale Korçe
65. Shoqata Rajonale Gjirokaster
66. Shoqata Rajonale Lezhe

d.c./shqiptarja.com