Thaçi me Mogherinin: Në verë MSA
dhe brenda vitit liberalizimi i vizave

PRISHTINE - Zëvendëskryeministri dhe Ministri i Punëve të Jashtme të Kosovës, Hashim Thaçi, ka takuar dje përfaqësuesen e lartë të Bashkimit Evropian për Politikën e Jashtme dhe Sigurinë, Frederica Mogherini, me të cilën ka biseduar për procesin e integrimit të Kosovës, dialogun me Serbinë dhe për Gjykatën Speciale.

Përmes një postimi në rrjetet sociale Thaçi shprehet se nga biseda mes tyre është rënë dakord për progresin e Kosovës në këto kohë. Por sipas tij kjo do të kurorëzohej me marrëveshjen e Stabilizim-Asocimit këtë verë dhe me liberalizimin e vizave këtë vit.

“Mbrëmë takova shefen e diplomacisë së BE-së, zonjën Mogherini me të cilën u pajtuam për progresin që Kosova ka shënuar në rrugëtimin evropian. Po ashtu pajtuam për nevojën e vazhdimit të dialogut dhe implementimit të marrëveshjeve, themelimin e Gjykatës Speciale si dhe për suksesin e Prishtinës në organizimin e Konferencës së Ballkanit Perëndimor. Kosova u konfirmua si promovuese e paqes dhe bashkëpunimit në Ballkan dhe këto rezultate duhet të kurorëzohen me nënshkrimin e MSA-së para verës dhe liberalizimin e vizave brenda këtij viti”, shkruan Thaçi në profilin e tij në “Facebook”.



Redaksia Online
(e.c/shqiptarja.com)