Tirana mirëpret liderët e Ballkanit Perëndimor në samitin dy ditor

Pasditen e sotme, presidenti Ilir Meta është takuar me Përfaqësuesen e Lartë të Bashkimit Europian, Federica Mogherini. Në fokus të bisedes së tyre ka qenë integrimi i Shqipërisë në Bashkimin Europian. Duke u ndalur tek situata politike, Meta vë theksin se dialogu është e vetmja mënyrë për të kapërcyer sfidat me të cilat përballet vendi.

"Kënaqësi të takohem me Përfaqësuesen e Lartë të Bashkimit Europian, Federica Mogherini. Pavarësisht sfidave dhe vështirësive që mund të kapërcehen vetëm me dialog e bashkëpunim, integrimi europian është e vetmja rrugë përpara. Prania e saj në Samitin e Brdo-Brijuni, tregues i rëndësisë që BE i jep bashkëpunimit rajonal", shkruan Meta. 

Presidenti Ilir Meta ka mirëpritur mbrëmjen e sotme homologun e tij malazez Milo Gjukanoviç. Duke e konsideruar atë një aktor kyç për forcimin e bashkëpunimit rajonal, Meta shkruan se marrëdhëniet mes dy vendeve janë të shkëlqyera.

'I lumtur të takohem në Tiranë me Presidentin e Malit të Zi, Milo Gjukanoviç. E vlerësoj praninë e tij në Samitin e Brdo-Brijunit, duke e konsideruar një aktor kyç për forcimin e bashkëpunimit rajonal. Marrëdhënie të shkëlqyera miqësore e historike midis dy vendeve tona', ka shkruar Meta. 

Presidenti Meta priti në Tiranë kryetarin e Presidencës së Bosnjës dhe Hercegovinës, Milorad Dodik dhe Anëtarin e Presidencës, Šefik Džaferović, në kuadër të samitit të Brdo-Brijunit.

Kryetari i Presidencës së Bosnjës dhe Hercegovinës, Milorad Dodik vjen për herë të parë në Shqipëri.

“Kënaqësi të takoja sot Kryetarin e Presidencës së Bosnjës dhe Hercegovinës, Milorad Dodik dhe Anëtarin e Presidencës, Šefik Džaferović. Prania e tyre në Samitin e Brdo-Brijunit në Tiranë, kontribut i çmuar për një rajon të orientuar qartë ndaj vlerave europiane. Shprehëm vullnetin e përbashkët për hapjen e ambasadave respektive në të dy vendet tona. Besimplotë për të ardhmen e shkëlqyer të marrëdhënieve midis Shqipërisë e Bosnjë dhe Hercegovinës”, shprehet Meta.