Tiranë, 400 punonjës të QSUT
2 muaj në punë pa rroga

TIRANË - Rreth 400 punonjës të administratës së Qendrës Universitare Spitalore “Nënë Tereza” ka dy muaj që nuk marrin pagat. Bëhet fjalë për sanitarë, personel ndihmës të administratës, por edhe mjekë e infermierë të rinj të cilët janë punësuar me kontratë provizore, 2-4 apo 6 mujore. Sapo mbushej ky afat, kontratat iu rinovoheshin sërish, por që prej dy muajsh plot 400 punonjës nuk kanë marrë asnjë lekë për punën e kryer, ndërsa askush nuk i ka njoftuar se janë ndërprerë marrëdhëniet e punës. Vetëm gjatë ditës së djeshme dhe të sotme, në redaksinë e “Shqiptarja.com”, kanë mbërritur 5 ankesa nga këta punonjës, të cilët thonë se nuk e kanë të qartë nëse do t’i marrin paratë e tyre apo jo.

“Të paktën të na thonë se si qëndron puna dhe ne të mos shkojmë kot, nëse nuk do të na i japin lekët”, - na thotë një punonjëse e kësaj administrate, që e kanë lëvizur edhe nga pozicioni i punës. Ndërkohë që një tjetër i prekur nga kjo reformë thotë se vendet e tyre tashmë janë zënë.

 “Ne e shikojmë se si është puna, pasi ne jemi çdo ditë aty. Në të njëjtin vend pune me mua, dhe kështu kanë bërë thuajse me të gjithë ne që kishim kontratë provizore, kanë marrë persona të tjerë në punë, që për më tepër janë simpatizantë të LSI-së. Këta çuditërisht e kanë marrë rrogën rregullisht. Kurse për ne nuk ka para. Se normal, duke i dubluar vendet, administratë është tej mase e fryrë dhe nuk kanë se ku i gjejnë paratë edhe për ne edhe për simpatizantët e partisë. Ne do t’i presim edhe pak ditë, pastaj do të organizohemi në protesta a në çfarëdo lloj forme, pasi askush nuk mund të marrë atë që na takon. Ne mbajmë familjet me këtë rrogë, ndërkohë që u bëmë dy muaj që nuk e marrim”- shprehet i indinjuar punëtori tjetër i prekur nga kjo ‘reformë’.

Ndërkohë burime pranë drejtorisë së QSUT-së na sqarojnë se nuk është e vërtetë se ka probleme me pagat, apo dublime vendesh pune, por vetëm vonesa të momentit dhe shumë shpejt lekët do të kalojnë në llogarinë e të gjithë punonjësve të QSUT-së, e cila ka në total rreth 3400 punonjës përfshi mjekë, infermierë, administratë e staf mbështetës.

(ek/aq/shqiptarja.com)